वीज चोरी गुन्हा

वीजचोरी प्रकरणी
दोन गुन्हे दाखल

कोल्हापूर, ता. १ : येथील इचलकरंजी (ता. हातकणंगले) व गिरगाव (ता. करवीर) येथील दोन वीज ग्राहकांनी (लघुदाब वीज जोडणी) मीटरमध्ये फेरफार करून १४ लाख ९३ हजारांची वीजचोरी केली. याप्रकरणी महावितरणने मारुती बाबूराव चौगुले, बाबू शिवयोगी चौगुले, विजय चौगले यांच्या विरुद्ध जुना राजवाडा पोलिस ठाण्यात वीजचोरीचा गुन्हा दाखल केला. इचलकरंजी येथील बाबू चौगुले व मारुती चौगुले यांच्या वीज मीटरची भरारी पथकाने तपासणी केली. यात फेरफार केल्याचे दिसून आले. यानंतर या ग्राहकाचा वीज चोरीचा कालावधी तीन वर्षे ५ महिने निर्धारित केला. या काळात ९२ हजार ५६७ युनिटची वीज चोरी केल्याचे उघड झाले. या वीजेची रक्कम त्याची रक्कम १३ लाख ७६ हजार ७१२ रुपये व तडजोड रक्कम १ लाख १० हजार रुपये होते.
गिरगाव (ता. करवीर) येथील विजय चौगले (लघुदाब औद्योगिक वीज ग्राहक) यांच्याही मीटरमध्ये फेरफार केल्याचे आढळले. या वीजचोरीचा कालावधी १ वर्ष ३ महिने निर्धारित केला. त्याची रक्कम १ लाख १७ हजार ६० रुपये व तडजोड रक्कम ६० हजार रुपये इतकी होते. कारवाईत महावितरणच्या भरारी पथकाचे अतिरिक्त कार्यकारी अभियंता राकेश मगर, सहायक अभियंता नितीन जोशी, सहायक सुरक्षा व अंमलबजावणी अधिकारी वर्षा जाधव, वरिष्ठ तंत्रज्ञ राजेंद्र कोरवी, निखिल कांबळे यांनी सहभाग घेतला.