धोकादायक इमारती

34217

३४ धोकादायक इमारतीतील
नागरिकांना स्थलांतराच्या सूचना

कोल्हापूर, ता. ६ ः मालक व कूळ वाद, न्यायालयीन खटल्यांमुळे इमारत रिकाम्या न केलेल्या ३४ धोकादायक इमारतींतील नागरिकांना अतिवृष्टीमुळे धोका होऊ नये म्हणून स्थलांतरित होण्याच्या सूचना महापालिकेने दिल्या आहेत. महाद्वार रोड, अंबाबाई मंदिर परिसर, लक्ष्मीपुरी, बुधवार पेठ, शुक्रवार पेठ, तोरस्कर चौक, ताराबाई रोड येथील इमारती आहेत.
विभागीय कार्यालय २ छत्रपती शिवाजी मार्केट अंतर्गत शहरातील मध्यवस्तीतील भाग येतो. अनेक इमारती जुन्या आहेत. त्यातील १३४ धोकादायक इमारती होत्या. यापैकी ८६ इमारतींवर कारवाई करून त्या दुरुस्त करून घेतल्या, तसेच काहींची नवीन बांधकामे झाली. ३४ इमारतींमधील नागरिकांना स्थलांतरित होण्याच्या सूचना आज महापालिकेने दिल्या. यावेळी नागरिकांना घर रिकामे करून निवारा केंद्राच्या ठिकाणी स्थलांतरित होण्याच्या सूचना देताना चित्रीकरण केले आहे. उपशहर अभियंता नारायण भोसले यांच्या मार्गदर्शनाखाली, कनिष्ठ अभियंता प्रमोद बराले, निवास पोवार, सागर शिंदे व कर्मचाऱ्यांनी कारवाई केली.