पोलिस वृत्त

३७८०६

उजळाईवाडी मंदिरातील
चोरीचा दिवसांत छडा
परिसरातीलच संशयिताकडून मुद्देमाल जप्त
उजळाईवाडी, ता. २२ ः उजळाईवाडी (ता. करवीर) येथील मंदिरातील चोरीचा स्थानिक गुन्हे अन्वेषण शाखेने एका दिवसात छडा लावला. याप्रकरणी तरुणास जेरबंद केले. राजा ऊर्फ रविराज महेश कसबेकर (वय २१, टेंबलाई नाका परिसर) असे संशयिताचे नाव आहे. त्याच्याकडून २० हजारांहून अधिकचा मुद्देमाल जप्त केल्याची माहिती पोलिस निरीक्षक संजय गोर्ले यांनी दिली.
पोलिसांनी सांगितले, उजळाईवाडी येथील साई मंदिरात १९ जुलैला चोरी झाली होती. चोरट्याने बंद दरवाज्याचा कडीकोयंडा उचकटून मूर्तीसह अलंकार, भांडी असा ऐवज चोरून नेला होता. याची नोंद गोकुळ शिरगाव पोलिस ठाण्यात झाली. हा प्रकार संशयित राजा ऊर्फ रविराजने केला असून तो चोरलेल्या वस्तू विक्रीसाठी कंदलगाव येथील एका हॉटेलजवळ येणार असल्याची माहिती पथकाला मिळाली. त्यानुसार त्याला ताब्यात घेऊन त्याच्याकडून २० हजार ८४० रुपयांचा मुद्देमाल जप्त केल्याचे गोर्ले यांनी सांगितले.
ही कारवाई पोलिस अधीक्षक शैलेश बलकवडे, अपर अधीक्षक तिरुपती काकडे यांच्या मार्गदर्शनाखाली स्थानिक गुन्हे अन्वेषण शाखेचे निरीक्षक संजय गोर्ले, सहायक निरीक्षक शिवानंद कुंभार तसेच अंमलदार सुरेश पाटील, असिफ कलायगार, रामचंद्र कोळी, विनोद कांबळे, रणजित पाटील, अनिल जाधव, संजय पडवळ व संतोष पाटील यांनी केली आहे.

सीसीटीव्हीची मदत
उजळाईवाडी ग्रामपंचायतीने नव्यानेच बसवलेल्या सीसीटीव्ही कॅमेऱ्यांमुळे चोरटे पकडण्यासाठी पोलिसांना मोलाची मदत झाली आहे.