तरुणाचा मृत्यू

३७९४७, ४८

वीज खांबावरून पडून शिकाऊ तरुणाचा मृत्यू
पडवळवाडीत घटना; महावितरणचे कर्मचारी न आल्याने नातेवाईक संतप्त, सीपीआरमध्ये तणाव

सकाळ वृत्तसेवा
कोल्हापूर, ता. २१ ः पडवळवाडी (ता. करवीर) येथे विद्युत खांबावरून पडून जखमी झालेल्या तरुणाचा सीपीआरमध्ये उपचारापूर्वीच मृत्यू झाला. प्रथमेश विजय सुतार (वय २०, आसुर्ले, ता. पन्हाळा) असे त्यांचे नाव आहे. तो महावितरणकडे शिकाऊ उमेदवार म्हणून काम करत असूनही महावितरणचे अधिकारी कर्मचारी घटनास्थळी न आल्याने नातेवाईक संतप्त झाले. त्यामुळे सीपीआरमध्ये तणाव निर्माण झाला होता.
पोलिसांनी आणि नातेवाईकांनी दिलेली माहिती अशी, प्रथमेश सुतार आयटीआय झाल्यानंतर महावितरणमध्ये शिकाऊ उमेदवार म्हणून काम करत होता. पडवळवाडी येथे आज सायंकाळी विद्युत खांबावरून पडून तो जखमी झाला. त्याला खासगी रुग्णालयातून सीपीआरमध्ये दाखल केले; मात्र उपचारापूर्वीच त्याचा मृत्यू झाला. याची माहिती मिळताच नातेवाईक व ग्रामस्थांनी सीपीआरमध्ये गर्दी केली.
नातेवाईकांनी ही घटना कशी घडली? प्रथमेशला विजेचा धक्का बसला काय? महावितरणचे कर्मचारी कोठे आहेत? असे अनेक प्रश्न पोलिसांनी केले. त्यावेळी त्यांना महावितरणचा एकही अधिकारी अगर कर्मचारी येथे उपस्थित नसल्याचे समजले. तसे ते संतप्त झाले. त्यामुळे सीपीआर शवविच्छेदन विभागाच्या बाहेर तणावाचे वातावरण निर्माण झाले. घटनेची माहिती मिळताच लक्ष्मीपुरी पोलिस ठाण्याचे पोलिस निरीक्षक संतोष जाधव, करवीरचे उपनिरीक्षक विक्रांत चव्हाण हे फौजफाटा घेऊन दाखल झाले. त्यांनी नातेवाईकांची समजूत काढण्याचा प्रयत्न केला. मात्र ते ऐकण्याच्या स्थितीत नव्हते. प्रथमेशच्या मागे आई, वडील, बहीण असा परिवार आहे.