जिल्‍हा परिषदेतील गर्दी ओसरली

जिल्‍हा परिषदेतील
गर्दी ओसरली

कोल्‍हापूर : राज्यात झालेला सत्ता बदल, जिल्‍हा नियोजन मंडळाच्या निधीला ब्रेक, विविध विकासकामे तसेच निविदा प्रक्रिया थांबवण्याचे आदेश दिल्याने जिल्‍हा परिषदेत मात्र शुकशुकाट पाहायला मिळत आहे. महिन्यापूर्वी जिल्‍हा परिषदेत निधी मिळवण्यासाठी व विकासकामे मार्गी लावण्यासाठी माजी सदस्यांसह कंत्राटदारांची लगबग सुरु होती. मात्र राज्यात अचानक सत्ता बदल झाला. सत्तेवर आलेल्या शिंदे-फडणवीस सरकारने महाविकास आघाडीच्या काळात मंजूर झालेल्या निधी वितरणाचे आदेश स्‍थगिती व रद्द केले आहेत. त्यामुळे विकासकामांसाठी, निविदेसाठी जिल्‍हा परिषदेत होणारी गर्दी अचानक थांबली आहे. नवीन सरकारच्या मंत्रिमंडळाचा विस्‍तार, पालकमंत्र्यांची नेमणूक व जिल्‍ह्यातील काही आमदारांची मंत्रिमंडळात वर्णी लागल्यानंतरच जिल्‍हा परिषदेत गर्दी होण्यास सुरुवात होईल. यापूर्वी प्रशासकांना विकासकामे मंजुरीचे असणारे अधिकारही अप्रत्यक्षरित्‍या गोठवले आहेत. त्यामुळे जिल्‍हा परिषदेतील खातेप्रमुखही सध्या निवांत आहेत.