गुदमरून मृत्यू

चिमुकल्याचा पिठात पडून
गुदमरल्याने दुर्दैवी मृत्यू
वडणगे, ता. ३ : तोल जाऊन पिठाच्या बुट्टीत पडल्याने चिमुकल्याला आज आपला जीव गमवावा लागला. कृष्णराज राजाराम यमगर (वय ९ महिने, रा. जुना वाशीनाका) असे त्याचे नाव आहे. वडणगे (ता. करवीर) येथे आज सायंकाळी साडेपाचच्या सुमारास ही घटना घडली. घरच्यांच्या लक्षात येताच त्याला उपचारासाठी खासगी रुग्णालयात नेले; मात्र, नाका-तोंडात पीठ गेल्याने गुदमरून त्याचा मृत्यू झाल्याचे डॉक्टरांनी स्पष्ट केले.
याबाबत पोलिसांनी दिलेली माहिती अशी ः जुना वाशीनाका येथील सुप्रिया राजाराम यमगर या आपला मुलगा कृष्णराज याला घेऊन वडणगे (ता. करवीर) येथे आपल्या आजीकडे आल्या होत्या. सायंकाळी कृष्णराज वॉकरमधून चालत होता. चालता-चालता त्याचा गव्हाच्या पिठाच्या बुट्टीत तोल गेला. आजीने त्याला या बुट्टीतून बाहेर काढले. त्यावेळी कृष्णराजच्या तोंडात आणि नाकात गव्हाचे पीठ गेले होते. ते पीठ त्याच्या नाका-तोंडात चिकटून बसले. हे लक्षात येताच त्याला कुटुंबीयांनी तत्काळ रुग्णालयात नेले; मात्र, चिकटलेल्या पिठामुळे त्याचा गुदमरून मृत्यू झाला होता. नऊ महिन्यांच्या बालकाचा असा दुर्दैवी मृत्यू झाल्याचे कळताच त्याच्या कुटुंबीयांनी हंबरडा फोडला. दरम्यान, या घटनेची करवीर पोलिस ठाण्यात नोंद झाली आहे.