संस्कृतीचे जतन करणाऱ्या पिढीची गरज

संस्कृतीचे जतन करणाऱ्या
पिढीची गरज ः प्राचार्य पाटील

कोल्हापूर, ता. १० ः आई-वडील हे पहिले शिक्षक आणि शिक्षक हे दुसरे आई-वडील अशी आपली भारतीय संस्कृती आहे. त्यानुसार पालक, शिक्षक यांच्या समन्वयातून मुलांमध्ये परिवर्तन घडवून सक्षम, जबाबदार, सामाजिक भान असणारी आणि संस्कारांच्या शिदोरीवर संस्कृतीचे जतन करणारी पिढी निर्माण करणे ही आजच्या काळाची गरज आहे, असे मत डीआरके कॉमर्स कॉलेजचे प्राचार्य डॉ. व्ही. ए. पाटील यांनी येथे व्यक्त केले.
कॉलेजमधील शिक्षक पालक सहविचार सभेत अध्यक्षस्थानावरून ते बोलत होते. पालक म्हणून आपली काय कर्तव्य आहेत आणि ती आपण कशाप्रकारे बजावली पाहिजेत याबाबत ज्युनिअर विभागप्रमुख प्रा. बी. डी. डवंग यांनी मार्गदर्शन केले. विद्यार्थ्यांच्या व्यक्तिमत्त्व विकासात पालक आणि शिक्षकांची भूमिका याविषयी प्रा. एम.पी. वंडकर यांनी मार्गदर्शन केले. प्रा. टी. एस. चौगुले यांनी परीक्षा व मूल्यमापन पद्धतीची माहिती दिली. प्रा. जी. एन. धुमाळ यांनी प्रास्ताविक केले. संयोजन प्रा. ए. व्ही. पाटील यांनी केले.