महापालिका कुस्ती स्पर्दा

राजर्षी शाहू केसरी कुस्ती स्पर्धेचे
दोन जूनपासून आयोजन
खासबाग मैदानात पुरूष, महिला गटाच्या लढती
कोल्हापूर, २५ : कोल्हापूर जिल्हा व शहर राष्ट्रीय तालीम संघाच्या मान्यतेने महानगरपालिकेने दोन ते चार जून दरम्यान पुरूष व महिलांच्या राज्यस्तरीय राजर्षी शाहू केसरी कुस्ती स्पर्धेचे आयोजन केले आहे. पुरूषांच्या खुल्या गटातील (८६ किलोवर) विजेत्याला एक लाखाचे तर महिलांच्या खुल्या गटातील (६० किलोवर) विजेत्यास ५० हजाराचे बक्षीस आहे. राजर्षी शाहू स्मृती शताब्दी वर्षानिमित्त राजर्षी शाहू खासबाग कुस्ती मैदानात या स्पर्धा होत आहेत.
याबाबतची माहिती तालीम संघाचे अध्यक्ष व्ही. बी. पाटील, सरचिटणीस ॲड. महादेवराव आडगुळे, सचिव अशोक पोवार, माजी महापौर आर. के. पोवार, विनोद चौगुले, विष्णू जोशीलकर, अंजली जाधव, नामदेव मोळे तसेच उपायुक्त रविकांत आडसूळ, इस्टेट अधिकारी सचिन जाधव यांनी दिली.
पुरूष गटात आठ व महिला गटात तीन वजन गटात स्पर्धा होणार आहेत. पुरूष खुला गट राजर्षी शाहू केसरी कुस्ती स्पर्धा व महिला गटात राजर्षी शाहू महिला केसरी स्पर्धा होणार आहे. विजयी मल्लांना ५ लाख ७१ हजारावर रोख बक्षीस व प्रशस्तीपत्र देण्यात येणार आहे. चार जूनला खुल्या गटात मैदानी काटा जोड कुस्ती उपमहाराष्ट्र केसरी माऊली कोकाटे व राष्ट्रीय सुवर्ण पदक विजेता शैलेश शेळके यांच्यात निकाली कुस्ती होणार आहे. जास्तीत जास्त स्पर्धकांनी भाग घ्यावा, असे आवाहन प्रशासक डॉ. कादंबरी बलकवडे यांनी केले आहे.
पुरूषांच्या ५७ किलो गटासाठी प्रथम बक्षीस ७ हजार, ६१ किलोसाठी १० हजार, ६५ किलोसाठी साडेबारा हजार, ७० किलो व ७४ किलोसाठी १५ हजार, ७९ किलोसाठी २० हजार, ८६ किलोसाठी २५ हजार बक्षीस आहे. तर महिला गटातील ५५ किलोसाठी १० हजार, ६० किलोसाठी १५ हजार बक्षीस ठेवले आहे. पुरूष गटासाठी एकूण ४ लाख ३६ हजारांची तर महिला गटासाठी एक लाख ३५ हजारांची बक्षीसे आहेत.