मुरगूडला लाखांची बक्षिसे असणारी बैलगाडी शर्यत.

मुरगूडला उद्या भव्य बैलगाडी शर्यती
मुरगूड, ता. ३ : मंडलिक युवा प्रतिष्ठानचे अध्यक्ष वीरेंद्र मंडलिक यांच्या वाढदिवसानिमित्त वाढदिवस गौरव समिती व राणा प्रताप क्रीडा मंडळातर्फे रविवारी (ता. ५) सायंकाळी ४ वाजता तीन लाखांची बक्षिसे असणाऱ्या दुबैलगाडी (विनाकाठी व विनामोटारसायकल) शर्यतींचे आयोजन केले आहे, अशी माहिती संयोजकांनी पत्रकार परिषदेत दिली.
जनरल बैलगाडी शर्यतीसाठी प्रथम क्रमांकासाठी १ लाख २५ हजार २२८ रु. बक्षीस आहे. दुसऱ्या व तिसऱ्या क्रमांकासाठी अनुक्रमे ७५ हजार २२८ रुपये व ५१ हजार २२८ रुपये बक्षीस आहे. ‘ब’ गटातील बैलगाडी शर्यतीसाठी पहिल्या तीन क्रमांकांसाठी अनुक्रमे २५ हजार २२८, १५ हजार २२८ व रुपये १० हजार २२८ अशी बक्षिसे आहेत. स्पर्धेसाठी महाराष्ट्र व कर्नाटकमधून बैलगाड्या सहभागी असतील. सरपिराजीराव तलावाच्या माळावर होणाऱ्या शर्यती विनाकाठी व विनामोटारसायकल गाडी होतील. पत्रकार परिषदेस माजी नगराध्यक्ष पांडुरंग भाट, नामदेवराव मेंडके, जयसिंग भोसले, दीपक शिंदे, शिवाजीराव चौगले उपस्थित होते.