पोर्ले-अपघात बातमी

20249

साखर पोत्यांची थप्पी
पडून हमालाचा मृत्यू
एक गंभीर; दत्त दालमिया कारखान्यातील घटना
कोल्हापूर, ता. ७ ः आसुर्ले पोर्ले येथील श्री दत्त दालमिया साखर कारखान्यात आज दुपारी साखर पोत्यांची थप्पी पडून एका हमालाचा मृत्यू तर एकजण गंभीर जखमी झाला.
याबाबत घटनास्थळावरून मिळालेली माहिती अशी, आज दुपारी दोनच्या सुमारास साखर गोडावूनमध्ये ट्रकमध्ये साखर पोती भरीत असताना अचानक साखर पोत्यांची थप्पी पडून दोघे गंभीर जखमी झाले. त्यांना तातडीने कोल्हापुरातील एका खासगी रुग्णालयात दाखल केले. उपचार सुरू असताना एकाचा दुपारी मृत्यू झाला. सेरबंग ठाणेश्वर नारझरी (वय ४५, मूळ रा. आसाम, सध्या रा. आसुर्ले, पोर्ले) असे त्यांचे नाव आहे. सायंकाळी मृतदेह शवविच्छेदनासाठी सीपीआरमध्ये आणला होता. त्यांचे नातेवाईक कोल्हापूरला येण्यासाठी आसाममधून रवाना झाले आहेत. पोलिस त्यांची प्रतीक्षा करीत होते. दरम्यान, दुसऱ्या जखमीवर उपचार सुरू असल्याचे पोलिसांनी सांगितले.