पन्हाळा : महापुरातील भरपाईसाठी मनसेचे दंडवत आंदोलन 

आपटी - पावसामुळे पिकांचे व घरांच्या झालेल्या नुकसानीबाबत शासन किती नुकसान भरपाई देणार, गड किल्ले भाड्याने देण्याच्या निर्णयाविरोधात आज महाराष्ट्र नवनिर्माण सेनेने पन्हाळा येथील बाजीप्रभू पुतळ्यापासून तहसील कार्यालयापर्यंत दंडवत घालत आंदोलन केले.

तहसीलदार रमेश शेंडगे यांना निवेदन दिले. जिल्हा उपाध्यक्ष संजय पाटील व विभाग प्रमुख विशाल मोरे बाजीप्रभू यांच्या पुतळ्यापासून दंडवत घालत हलगी व कैचाळाच्या गजरात तहसील कार्यालयासमोर आले. तहसीलदारांना दिलेल्या निवेदनात अतिवृष्टीमुळे आलेल्या महापुरात शेतकऱ्यांच्या पिकांचे व घरांचे नुकसान झाले आहे. अद्याप शासनाने नुकसानग्रस्त शेतकऱ्यांना किती नुकसान भरपाई देणार ते जाहीर केलेले नाही.

भरपाई देत असताना बागायत शेतकऱ्यास प्रतिगुंठा 2500 तर जिरायतसाठी प्रतिगुंठा 1000 रुपये याप्रमाणे द्यावी. भरपाई थेट नुकसानग्रस्त शेतकऱ्यापर्यंत पोहचवावी. गड किल्ले भाड्याने देण्याच्या बाबतीत घेतलेला निर्णय शासनाने त्वरित मागे घ्यावा. अन्यथा तीव्र आंदोलन करेल असा इशारा दिला आहे. आंदोलनात नयन गायकवाड, रमेश मेनकर, मोहन शेळके, पांडुरंग पाटील, कृष्णात दिंडे व कार्यकर्ते उपस्थित होते.