कऱ्हाड दक्षिणमधूनच विधानसभा लढणार - पृथ्वीराज चव्हाण

सातारा - मी कुठून निवडणूक लढणार याबाबतच्या अनेक वावड्या उठत आहेत. पुणे, नागपूर, सांगलीतून लढणार असे सांगण्यात येत आहे. मात्र, मी कुठेही जाणार नाही. आगामी विधानसभेची निवडणूक कऱ्हाड दक्षिणमधूनच लढवेन. महाराष्ट्रात पुन्हा काँग्रेसचे सरकार आणण्यासाठी काम करीत राहणार आहे, असे माजी मुख्यमंत्री पृथ्वीराज चव्हाण यांनी आज येथे स्पष्ट केले. 

साताऱ्यातील काँग्रेस भवनात काँग्रेसचे नूतन जिल्हाध्यक्ष रणजितसिंह नाईक-निंबाळकर यांचे पदग्रहण आणि कार्यकर्ता मेळाव्यात ते बोलत होते. त्या वेळी आमदार मोहनराव कदम, जयकुमार गोरे, आनंदराव पाटील, माजी खासदार हिंदूराव नाईक-निंबाळकर, शिवराज मोरे, यशवंत हप्पे आदी उपस्थित होते. 

श्री. चव्हाण म्हणाले, ‘‘आपल्यातील मतभेद बाजूला करून प्रत्येकाला पक्षात घेऊन सत्ता परिवर्तन हे एकच ध्येय ठेवून रणजितसिंहांनी वाटचाल करावी. जिल्ह्यात काँग्रेस वाढविण्यासाठी सर्व इतर जबाबदाऱ्या बाजूला ठेवून मी प्रत्येक तालुकास्तरावरील मेळाव्यास येण्यास तयार आहे. त्यासाठी सर्व पदाधिकाऱ्यांनी आता कामाला लागावे.’’