अवहेलना... "दिव्यांग' घालणार "यांचे' श्राद्ध 

सकाळ वृत्तसेवा
सोमवार, 2 डिसेंबर 2019

शहरातील सर्व संवर्गातील एक हजार 761 दिव्यांगांची नोंदणी

 दिव्यांग विद्यार्थ्यांना आर्थिक मदत दिली जात आहे. दिव्यांगांसाठी विविध स्पर्धा आयोजित करून त्यांना प्रथम, द्वितीय आणि तृतीय तसेच दोन उत्तेजनार्थ पारितोषिक आणि स्मृतिचिन्हे देण्याचा ठराव झालेला आहे. .दिव्यांगांच्या एका बचत गटासाठी प्रत्येकी साधारणतः पाच हजार रुपये, विवाहासाठी 20 हजार रुपये आणि उद्योगासाठी 50 हजार रुपये उपलब्ध करून देण्यात येत आहेत. दिव्यांगांसाठी मनपाच्या मंडईमधील ओटे आरक्षित ठेवण्यात येणार असून त्यासाठी कोणतेही शुल्क आकारण्यात येणार नाही. दिव्यांगांसाठी मनपाचे जलतरण तलावासाठी शुल्क माफ केले आहे. दरमान मानधन देण्याचा ठराव नुकताच झाला आहे. 
- विजयकुमार कांबळे, जनसंपर्क अधिकारी 
सोलापूर महापालिका 

सोलापूर ः महापालिकेच्या अंदाजपत्रकात दिव्यांगांसाठी कोट्यवधी रुपयांची तरतूद असतानाही त्याची कार्यवाही झालेली नाही, त्याच्या निषेधार्थ प्रहार संघटनेच्या वतीने उद्या (मंगळवारी) महापालिका आयुक्त आणि प्रशासनाचे "श्राद्ध' घालणार आहे. जागतिक अपंग दिनादिवशी सकाळी 11 वाजता प्रहार संघटनेचे कार्यकर्ते महापालिकेत हे आंदोलन करणार आहेत.

हेही वाचा... सोलापूरच्या प्रगती सोलनकरला पराभवाचा धक्का 

कोट्यवधी रुपयांची तरतूद

दिव्यांगांसाठी झालेल्या ठरावाची अंमलबजावणी फक्त कागदावरच आहे. शहरातील दिव्यांगांना महापालिकेच्या गाळ्यांपैकी तीन टक्के गाळे उपलब्ध करून दिले जाणार आहेत. त्याचवेळी आर्थिक मदतही दिली जात असून, विविध योजनांच्या लाभाची कार्यवाही केली जात आहे. निधी अद्यापपर्यंत खर्ची घालत नसल्या कारणाने प्रहार संघटनेचे पदाधिकारी व सदस्य यांनी सोलापूर महापालिकेस भेट देऊन दिव्यांगांचे विविध योजनेचे कामकाज व निधीबाबत विचारणा करण्यात आली. त्या वेळी जनसंपर्क अधिकारी विजयकुमार कांबळे यांनी ही माहिती दिली. प्रहार संघटनेच्या वतीने शहरप्रमुख अजित कुलकर्णी, शहर संघटक जमीर शेख, शहर कार्याध्यक्ष खालिद मनियार, उपाध्यक्ष मुस्ताक शेखसंदी, सचिव संभाजी व्हनमारे, धनराज दुलंगे, प्रदीप कांबळे, अमोल जगदाळे, शब्बीर नदाफ, अयाज शेख आदींसह बहुसंख्य सदस्य उपस्थित होते. मात्र प्रत्यक्षात या योजनांची अंमलबजावणी अद्याप झालेली नाही, असे आंदोनकर्त्यांचे म्हणणे आहे. 

पाच टक्के तरतूदीची अंमलबजावणी व्हावी

महापालिकेने 2013 ते आजतागायत तरतूद केलेली पाच टक्के रक्कम खर्च करावी, दिव्यांगाना विनाअट घरकूल मिळावे, व्यवसायासाठी जागा उपलब्ध करून द्यावी, महापालिका हद्दीतील पाच टक्के गाळे उपलब्ध करावेत, दिव्यांगांना निर्वाह भत्ता द्यावा, दिव्यांगांचा निधी दुसरीकडे वळविणाऱ्या अधिकाऱ्यांवर कारवाई करावी, दिव्यांगांची अवहेलना करणाऱ्यांवर ऍट्रासिटी कायद्यान्वये कारवाई करावी, अशी मागणी संजीवनी बारंगुळे, अंबुताई गुजले व विजयशेखर चिनवार यांनी केली आहे.  
 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: problems of handicaped