उदयनराजेंच्या माजी नगरसेवकाच्या मुलावर अपहरणचा गुन्हा नाेंद

सातारा : फलक फाडल्याच्या कारणावरून युवकाचे अपहरण करून त्यास मारहाण केल्याप्रकरणी खासदार उदयनराजे भोसले यांच्या गटातील माजी नगरसेवक दिलीप गवळी यांच्या चिरंजीवासह अन्य सहा जणांवर शहर पोलिसांत गुन्हा दाखल झाला आहे. याबाबत तेजस सुनील पवार (मूळ रा. लावंघर, सध्या रा. शिवराज पेट्रोल पंप परिसर) यांनी फिर्याद दिली आहे.

शहर परिसरात उभारलेला फलक फाडल्याच्या संशयावरून शनिवारी (ता.25) शहरातील काही युवकांनी दोन युवकांना मारहाण करत त्यांना आपल्या ताब्यात ठेवले होते. याबाबतची माहिती मिळाल्यानंतर सातारा शहर पोलिसांनी बोगदा परिसरात कारवाई करत दोघांची सुटका केली. संशयितांनी केलेल्या मारहाणीत गणेश नवसरे हा युवक जखमी झाला होता. मारहाण झालेल्या दोन्ही युवकांना त्यांना अलिशान गाडीतून कोणत्या युवकांनी, कशासाठी नेले होते अशी चौकशी पोलिसांनी केली. दरम्यान या गंभीर प्रकाराची माहिती घेण्यासाठी दस्तुरखूद्द पोलिस अधीक्षक तेजस्वी सातपुते यांनी ही शहर पोलिस ठाण्यात तळ ठोकला होता. चौकशी अंतीगौरव दिलीप गवळी, विशाल अनिल वायदंडे, बबलू बाबूराव पवार त्यांच्यासह तीन ते चार साथीदारांवर (सर्व रा. सातारा शहर परिसर) अपहरण करुन मारहाण करणे हा गुन्हा दाखल झाला आहे. याबाबत तेजस सुनील पवार (मूळ रा. लावंघर, सध्या रा. शिवराज पेट्रोल पंप परिसर) यांनी फिर्याद दिली आहे.