सोलापूरचा पारा उच्चांकी ४५ अंशावर

सोलापूर - अंगातून जाळ काढणाऱ्या वातावरणाचा अनुभव सोलापूर शहर व परिसरात मंगळवारी आला. यंदाच्या उन्हाळ्यातील उच्चांकी ४५ अंश सेल्सिअस तापमानाची नोंद आज झाली. मे महिन्यात २००५ नंतर आज १४ वर्षांनी शहराचा पारा ४५ अंशांवर पोचला. २० मे २००५ रोजी सोलापुरात ४५.१ अंश सेल्सिअसची नोंद झाली होती. 

सोलापुरात यापूर्वी तीन वेळा ४४.३ अंश सेल्सिअसदरम्यान पारा राहिला होता. सोमवारीही (ता. २०) पारा ४४.३ अंश सेल्सिअस एवढा होता. आज उन्हाचा चटका वाढणार, असा अंदाज हवामान विभागाने व्यक्त केला होता. २७ मेपर्यंत ४३ ते ४४ अंश सेल्सिअसच्या दरम्यान तापमान राहील.

हिंगोलीत उष्माघाताचा पाचवा बळी
हिंगोली - शहरातील महात्मा गांधी चौकात आज सकाळी ४५ वर्षीय व्यक्‍तीचा मृतदेह आढळला. उष्माघातामुळे त्याचा मृत्यू झाल्याचा अंदाज पोलिसांनी व्यक्‍त केला. हिंगोली जिल्ह्यात यंदा तापमानाने उच्चांक गाठला आहे. दोन दिवसांपूर्वीच आखाडा बाळापूर येथे अनोळखी व्यक्तीचा उष्माघातामुळे मृत्यू झाला होता. त्यानंतर शहरात आज तशीच घटना निदर्शनास आली. जिल्ह्यात आतापर्यंत उष्माघाताने पाच बळी घेतले आहेत. दरम्यान, परभणीतही तापमान ४५.६ अंश सेल्सिअस होते.