सोलापूर : सभासदांसाठी ३० लाखांची कर्ज मर्यादा

अनगर : मनोहर डोंगरे प्राथमिक शिक्षक पतसंस्थेने या वर्षीपासून जिल्‍ह्‍यातील सर्व प्राथमिक शिक्षकांच्या पतसंस्थेपेक्षा सर्वाधिक ३० लाख रुपयांच्या कर्ज वाटपाची मर्यादा ठेवून त्याप्रमाणे वाटपही केले. शिवाय पतसंस्थेस यंदाच्या आर्थिक वर्षात १ कोटी ४० लाख ८२ हजार २७६ रुपयांचा निव्वळ नफा झाला. सभासदांना त्यांच्या कायम ठेव रकमेवरील लाभांश १२ टक्के दराने पतसंस्थेचे अध्यक्ष परमेश्वर गुंड यांनी जाहीर करून तो लवकरच सभासदांच्या खात्यावर जमा करण्यात येणार असल्याचे सांगितले.

डोंगरे पतसंस्थेची १६ वी वार्षिक सर्वसाधारण सभा रविवारी (ता.१९) अनगर (ता. मोहोळ) येथील रुक्मीणी घाटुळे मंगल कार्यालयात झाली. त्या प्रसंगी ते बोलत होते. अध्यक्षस्थानी संस्थेचे अध्यक्ष परमेश्वर गुंड होते. प्रारंभी सावित्रीबाई फुले, लोकनेते (स्व.) बाबुरावअण्णा पाटील अनगरकर, मातोश्री (स्व.) लक्ष्मीबाई बाबुराव पाटील यांच्या प्रतिमांचे पूजन सर्व मान्यवरांनी केले.

सेवानिवृत्त झालेल्या केंद्रप्रमुख, मुख्याध्यापक यांचा संस्थेने सत्कार केला. संचालक हनुमंत बंडगर यांनी अहवालाचे वाचन केले. त्यास उपस्थित सभासदांनी मान्यता दिली. सभा खेळीमेळीत झाली. याप्रसंगी तानाजी गुंड, रणजित थिटे, राजन ढवण, आप्पासाहेब देशमुख, राजकुमार राऊत आदींनी संस्था व सभासद हिताच्या सूचना मांडल्या. त्यास संचालक हनुमंत बंडगर यांनी समर्पक उत्तरे दिली.

व्यासपिठावर परमेश्वर गुंड, धर्मराज चवरे, हनुमंत बंडगर, आबा क्षीरसागर, नामदेव कुचेकर, लक्ष्मण गोफणे, ईश्वर वाघमोडे, तानाजी गुंड, श्रीमंत गुंड, आबा टेकळे, आप्पासाहेब देशमुख, रणजित थिटे, गिरीश व्हनकळसे, राजन ढवण, शिवाजी शेटे, धनंजय रणदिवे, ताजमा बागवान, उमा गुंड, तुकाराम ऐवळे, संजय ढेपे, ज्ञानेश्वर गुंड, ऋषीकेश जगताप, गणेश भंडारे, सचिन शिंदे, संजय आतकरे, चरण शेळके, वैशाली थोरात, स्नेहल पावले, समाधान डोलारे आदीं उपस्थित होते.

संचालक गणेश भंडारे यांनी सूत्रसंचालन केले तर संचालक लक्ष्मण गोफणे यांनी आभार मानले.