लढा दुष्काळाशी : दगडाची जाती बनविणाऱ्या कारागिरांना दुष्काळाच्या झळा..! (व्हिडीओ)

आटपाडी (सांगली) : गिरणी, मिक्सर, ग्राइंडर आल्याने जात्यावरील दळणाचा प्रकार कमी झाला असला तरी गावाकडे आजही जात्यावर दळण मोठ्या प्रमाणात दळलं जातं. तर शहरी, निमशहरी भागात लग्नं कार्य, पुजाकार्याला ही जाती खरेदी केली जातात. हे जातं घडविणाऱ्या कारागिरांच्या आयुष्यातही दुष्काळाने घाव घातला आहे. 'लढा दुष्काळाशी' फेसबुक लाईव्ह सिरिज अंतर्गत 'सकाळ'ची टीमने वर्षानुवर्ष 'जातं' घडविणाऱ्या कारागीर आज्जींशी संवाद साधला. 

धान्य कुठून आणावं आणि दुष्काळात कसं पोट भागवावं याविषयी शेतकरी वर्गातच विवंचना आहे. शेतकऱ्यांवर आणि शेतीवर अवलंबून असणारा हा व्यवसाय आहे. त्यामुळे 'इथं दुष्काळ हटावा, शेताशिवारात पाणी येऊन शेतीची, धान्याची भरभराट व्हावी,' अशी ईच्छा या आजीने व्यक्त केली. जात्याविषयी माहिती देताना त्या म्हणाल्या, 'दोन-तीन जाती दिवसातून बनविते. कर्नाटकावरुन जात्याचा दगड आणते. नऊशे ते हजारला एक जातं विकते. त्यात मला चारशे-पाचशे रुपये मिळतात.'