आश्वासने खोटी ठरल्याने भाजपला बसतील सतत चटके

सोलापूर : सत्तेवर येण्यासाठी दिलेली सर्व आश्वासने खोटी ठरल्याने भाजपला त्याचे चटके सोसावे लागतील, असा इशारा माजी केंद्रीय मंत्री सुशीलकुमार शिंदे यांनी दिला. चार राज्यांच्या निवडणूक निकालानंतर देशातील भाजपविरोधी आघाडीच्या प्रक्रियेला वेग येईल, असेही ते म्हणाले.

शिंदे यांनी त्यांच्या निवासस्थानी " सकाळ" शी  संवाद साधला. ते म्हणाले, देशाचे वातावरण बदल आहे. ज्या पद्धतीने भाजपने देशाला आश्वासित केले, 
ती सर्व आश्वासने खोटी ठरली आहेत. त्यामुळे त्यांच्यावर लोकांचा विश्वास राहीला नाही. त्यामुळे त्याचे चटके भाजपला सातत्याने सोसावे लागतील.

भारतीय जनता पार्टी व त्यांची सहयोगी पार्टी फक्त पब्लिसीटीच्या मागे आहेत. ज्या पद्धतीने पंतप्रधान बोलतात, बोलो जोर से बोलो...पण हातात काही नाही. आता यापेक्षा आणखी काय पुरावा हवा, की देशाच्या मुख्य निवडणूक आयुक्तांनी नोटाबंदीमुळे देशाचे नुकसान झाल्याचे वक्तव्य केले. हा सत्ताधाऱ्यांना घरचा आहेर आहे. सोलापूरच्या मतदारांना खोटी आश्वासने दिली. चार वर्षांत पाच मीटर कापडही खरेदी केले नाही. सोलापूरकरांची दिशाभूल केली, असेही शिंदे म्हणाले.

उमेदवार निश्चित प्रक्रियेमध्ये माझातरी सहभाग असला तरी, मला तशी घोषणा करता येणार नाही. पार्टीने सांगितले उभे रहा, रिझर्व्ह
जागेवर उभे राहण्यास सांगितले, उभा राहिलो. विधानसभेत यंदा आमच्या जागा निश्चित वाढणार आहेत, असा दावाही शिंदे यांनी केला.

... म्हणून झाला काँग्रेसचा पराभव
आमची सत्ता असताना एखाद्या मंत्र्यांवर किंवा पदाधिकाऱ्यांवर गैरव्यवहाराचे, भ्रष्टाचाराचे आरोप झाले की आम्ही त्यांचे राजीनामे घेत होतो.
केंद्रात व राज्यातही हीच भूमिका होती. त्यामुळे आमच्या पक्षात मोठे भ्रष्टाचारी आहेत, असे चित्र निर्माण झाले. त्याचा मोठा फटका आम्हाला बसला व कॅांग्रेसला पराभवाला सामोरे जावे लागले. आता कोट्यवधी रुपयांचे घोटाळे उघडकीस आले, मात्र कोणावरही कारवाई नाही की कुणाकडून राजीनामे घेतले नाहीत. राफेलचा घोटाळा हे त्याचे उत्तम उदाहरण
आहे, असे शिंदे म्हणाले.