गुजरीत 10 ग्रॅम सोने 32 हजारालाच... 

कोल्हापूर - सराफ बाजारात दहा ग्रॅम सोन्याचा आजचा दर 32 हजार रुपयेच असल्याचे व सोन्याच्या दरात वाढ, ही केवळ अफवा असल्याचे कोल्हापूर सराफ व्यापारी संघाचे उपाध्यक्ष राजेश राठोड यांनी आज "सकाळ'शी बोलताना स्पष्ट केले. ते म्हणाले, ""सोन्याची टंचाई, नोटा रद्दचा निर्णय, अमेरिका राष्ट्रध्यक्ष निवडणूक याचा कोणताही परिणाम सराफ बाजारावर नाही. उलट सोने 32 हजार रुपये दर असतानाही त्याला फारसे गिऱ्हाईक नाही. पाचशेच्या नोटा असलेले एक लाख रुपये गुजरीत घेऊन यायचे व त्या बदल्यात शंभरच्या नोटा असलेले 70 हजार रुपये घेऊन जायचे असला एकही व्यवहार गुजरीत झालेला नाही.'' 

ते म्हणाले,""आता कागदाचीच किंमत असलेल्या 500 रुपयांच्या नोटा घेऊन त्या बदल्यात कोणी सराफ आपल्याकडील किंमतमूल्य असलेल्या 100 रुपयांच्या नोटा दुसऱ्याला देत असेल तर तो केवळ मूर्खपणा असेल आणि कोणताही सराफ असला आतबट्ट्याचा व्यवहार करणार नाही. असे कोणी करत असेल तो देशद्रोहच असेल. पण आपल्याकडचा अधिकृत पैसा देऊन अनधिकृत पैसा घ्यायचा प्रकार कोणत्याही शहाण्या सराफाकडून होणार नाही. असा कोणताही प्रकार होत नसताना गुजरी बदनाम केली जात आहे.'' 

ते म्हणाले, ""ज्या दिवशी पाचशे, हजार रुपयांच्या नोटा रद्द झाल्या त्या क्षणापासून काही तासांत जरूर काही लोकांनी चढ्या दरातही सोने खरेदीसाठी प्रयत्न केला असेलही, पण अशा व्यवहारात सराफ अडकलेले नाहीत. आज सराफ बाजारात सोन्याचा दहा ग्रॅमचा दर 32 हजार रुपये आहे. सोनेही मुबलक आहे. नवीन नोटा किंवा शंभरच्या नोटा अथवा चेक दिल्यास पावतीसह सोने विक्री सुरू आहे आणि मध्यमवर्गीयांनी तर अशा खरेदीची भीती बाळगण्याचे कारणच नाही. मुद्दाम काही घटक गुजरीबद्दल गैरसमज पसरवत आहेत.''