वाहतूक कोंडीने वैतागले ओगलेवाडीकर

मुकुंद भट
सोमवार, 19 ऑगस्ट 2019

...अशा कराव्यात उपाययोजना

  • बाजार चौकात वाहतूक नियंत्रक पोलिस नेमावेत
  • मध्यवर्ती ठिकाणी सीसीटीव्ही व पथदिवे लावावेत
  • प्रवासी व विद्यार्थ्यांसाठी निवारा शेड उभारावी
  • पदपथावरील व्यावसायिक अतिक्रमणे हटवावीत
  • पोलिस ठाणे पूर्णवेळ उघडे ठेवावे
  • टेंपो व रिक्षा आणि दुचाकी यांच्यासाठी पार्किंगची सोय करावी
  • खराब भाजीपाला, केळाच्या साली रस्त्यावर टाकू नयेत
  • मोकाट जनावरांचा बंदोबस्त करावा
  • जाहिरातीचे फलकांमुळे होणारे विद्रुपीकरण थांबवावे
  • वाहतुकीस शिस्त लावण्यासाठी प्रबोधन करावे

ओगलेवाडी - कऱ्हाड-विटा रस्त्याच्या दुतर्फा वाढलेले अतिक्रमण, वाढलेली बेसुमार झाडे-झुडपे, घाणीचे साम्राज्य, रस्त्यावरील मोठमोठे खड्डे, वाहतूक कोंडी, वाहन पार्किंगचा अभाव आदी गंभीर समस्यांमुळे येथील आणि परिसरातील नागरिक वैतागले आहेत. येथून जाणारा मुख्य रस्ता हा कऱ्हाड-पंढरपूर-विजापूर राज्यमार्ग आहे. केंद्र सरकारने या मार्गाला राष्ट्रीय महामार्गाची मान्यता दिली आहे. त्यामुळे या रस्त्याला वाढते महत्त्व असल्याने येथील समस्यांकडे महामार्ग प्राधिकरण व ग्रामपंचायत लक्ष देणार का, अशी विचारणा नागरिक करत आहेत.

गावाजवळ लवकरच कऱ्हाड-टेंभू-तासगाव महामार्ग होणार आहे. त्यासंबंधी शासनाचे सर्वेक्षण झाले आहे. कऱ्हाड रेल्वे स्थानक जंक्‍शन होण्याच्या मार्गावर आहे. महामार्गालगतच ६५० कोटी रुपये खर्चाचे आंतरराष्ट्रीय पातळीवरचे भूकंप संशोधन केंद्र व विद्यापीठ होणार आहे. त्यामुळे वाढत्या वाहतुकीचा गंभीर प्रश्न परिसरात भेडसावणार आहे. त्या दृष्टिकोनातून वाहतुकीचे नियोजन व आखणी करणे गरजेचे आहे. रस्त्याच्या एका बाजूने हजारमाची, डिचोली व बाबरमाचीकडे जाणारा रस्ता आहे. लागूनच बाजार भरतो. रस्त्याच्या कडेला वाहने उभी राहत असल्याने रस्ता वाहतुकीस अपुरा पडत आहे. एकावेळी दोन वाहने नीट जावू शकत नाहीत. या रस्त्यावर शाळा, प्राथमिक आरोग्य केंद्र आहे. हाच रस्ता पुढे ऐतिहासिक सदाशिवगडाकडे जातो. पुढे पुनर्वसन डिचोली गाव आहे. तेथील विद्यार्थ्यांना शाळेसाठी तीन किलोमीटर पायपीट करावी लागते. अतिक्रमणांमुळे रस्ता अपुरा पडत असल्याने डिचोलीची एसटी सेवा बंद झाली आहे. श्रावण महिन्यात सदाशिवगडावर जाण्यास भाविक व पर्यटकांची मोठी गर्दी असते. रस्त्याच्या दुसऱ्या बाजूस पार्ले, बनवडीकडे जाणारा मार्ग आहे. या रस्त्यावर टेंभू प्रकल्प कार्यालय, वीज वितरण कंपनीचे कार्यालय, औद्योगिक वसाहत आहे. तसेच रेल्वे माल वाहतूक धक्का आहे. या ठिकाणाहून साखर, धान्य, खते, सिमेंटची रोज २५ हजार टन मालाची वाहतूक होते.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Traffic Issue in Ogalewadi Encroachment