जिल्ह्यातील 28 हजार शेतकऱ्यांनी घेतला 'ओटीएस'चा लाभ 

सोलापूर : दीड लाखाहून अधिक थकबाकी असलेल्या शेतकऱ्यांसाठी राज्य सरकारने एकरकमी परतफेड योजना (ओटीएस) सुरू केली. त्यानुसार जिल्ह्यातील 27 हजार 965 शेतकऱ्यांनी लाभ घेतला असून त्यांना कर्जमाफीच्या माध्यमातून 242 कोटी 26 लाख रुपये मिळाले आहेत. 

पंढरपूर आणि दक्षिण सोलापूर तालुक्‍यातून या योजनेला अल्प प्रतिसाद असून मोहोळ, बार्शी, करमाळा, माळशिरस, अक्‍कलकोट, सांगोला व उत्तर सोलापूर तालुक्‍यातील शेतकऱ्यांनी या योजनेचा लाभ घेतला आहे. या योजनेला आता 30 सप्टेंबरपर्यंत मुदतवाढ देण्यात आली आहे. दीड लाखावरील रक्‍कम संबंधित बॅंकांत भरल्याशिवाय शेतकऱ्यांना कर्जमाफीचा लाभ मिळणार नसल्याचे राज्य सरकारने यापूर्वीच स्पष्ट केले आहे. मात्र, जिल्ह्यातील सुमारे 22 हजार 'ओटीएस'साठी पात्र असलेल्या खातेदारांची यादीच शासनाकडून बॅंकांना प्राप्त झालेली नाही. त्यामुळे पैसे असूनही कर्जमाफीचा लाभ घेता येत नाही, अशी अवस्था शेतकऱ्यांची सध्या झाली आहे. कर्जमाफीचा लाभ घेतल्यानंतर पुन्हा शेतीकामांसाठी नव्याने बॅंकांकडून कर्ज काढता येईल, अशी शेतकऱ्यांची आशा आहे. परंतु, बहुतांश शेतकऱ्यांच्या याद्या शासनस्तरावरून बॅंकांना मिळत नाहीत. आणखी शेतकऱ्यांच्या माहितीची पडताळणीच सुरू असल्याची चर्चा आहे. 
 

आकडे बोलतात... 
ओटीएस चे लाभार्थी -
जिल्हा बॅंक - 5,467 
राष्ट्रीयीकृत बॅंका - 19,326 
विदर्भ कोकण बॅंक - 3,172 
एकूण - 27,965

आपण एका क्लिकवर ताजे अपडेट्स आपल्या मोबाईलमध्येही मिळवू शकता.

• 'ई सकाळ'चे अॅप डाउनलोड करण्यासाठी क्लिक करा.
• शेतीविषयीची अपडेट असलेले 'अॅग्रोवन' अॅप डाउनलोड करण्यासाठी ​क्लिक करा.
• राजकारणाची प्रत्येक घडामोड कळविणारे 'सरकारनामा' अॅप डाउनलोड करण्यासाठी क्लिक करा.