साताऱ्यातील भरतगावात 'मोबाईल सोडा मैदान जोडा' हा अनोखा उपक्रम

नागठाणे : मोबाईलच्या अतिरेकी वापरामुळे तरुण पिढीचे खेळाकडे दुर्लक्ष होताना दिसत आहे. त्याचा तरुणांच्या मानसिक, शारीरिकतेवर परिणाम होत आहे. या पार्श्वभूमीवर, भरतगाव (ता. सातारा) येथील युवकांनी 'मोबाईल सोडा मैदान जोडा' हा उपक्रम हाती घेतला आहे.

मोबाईलचा अतिरेकी वापर हा सध्या सर्वांच्याच चिंतेचा विषय बनला आहे. ही समस्या केवळ शहरी भागातच नव्हे, तर अगदी खेडोपाडीही भेडसावताना दिसत आहे. एरवी सकाळ- संध्याकाळी गर्दीने गजबजलेले ग्रामीण भागातील पारदेखील आता ओस पडलेले दिसतात. ग्रामीण भागाची ओळख असलेल्या तालिमींनाही आता घरघर लागली आहे. तरुण पिढी मोबाईलच्या विळख्यात सापडली आहे. मैदानी खेळांचे दर्शन अभावानेच घडते आहे. या पार्श्वभूमीवर भरतगावच्या युवकांनी खेळाला प्रोत्साहन मिळावे, तरुण वर्ग खेळाकडे आकृष्ट व्हावा यासाठी पुढाकार घेतला आहे.

या उपक्रमाचा भाग म्हणून व्हाॅलीबाॅल मैदानाची निर्मिती केली आहे. या मैदानाचे उद्घाटन मुंबई अग्निशामक दल संघाचे व्हाॅलिबाॅलपटू विजय शेडगे, बातमीदार सुनील शेडगे, किसन कदम, विश्वास देशमुख यांच्या हस्ते झाले, या वेळी नीलेश कदम, शांतिकुमार शेडगे, रमेश शेडगे, समाधान शेडगे, अमोल शेडगे, प्रशांत शेडगे, सुनील देशमुख, सुनील वि. शेडगे, बबन शेडगे आदींची कार्यक्रमास उपस्थिती होती. भरत भोसले, सूरज कणसे, विजय जाधव, अजय शेडगे आदींनी कार्यक्रमासाठी परिश्रम घेतले.

विविध उपक्रमांचे आयोजन
या उपक्रमांतर्गत व्हाॅलिबाॅलसह उंच उडी, लांब उडीसारख्या विविध खेळांची मैदाने तयार करण्यात येणार आहेत. सिंगल बार, डबल बार बसविण्यात येणार आहेत. व्यायामाचे साहित्यही उपलब्ध करून देण्यात येणार असल्याची माहिती अमोल शेडगे यांनी दिली.