Vidhan Sabha 2019 : अमित शहांच्या सभेला कोल्हापुरात शिवसेनेचा खासदार अनुपस्थित 

कोल्हापूर : केंद्रीय गृहमंत्री आणि भाजपचे अध्यक्ष अमित शहा यांची आज, कोल्हापुरात जाहीर प्रचार सभा झाली. या सभेला भाजपसह कोल्हापूर जिल्ह्यातील सर्व शिवसेना महायुतीचे उमेदवार उपस्थित होते. परंतु, शिवसेनेचे खासदार संजय मंडलिक यांची अनुपस्थिती चर्चेचा विषय ठरली.

हिंमत असेल तर, कलम 370 परत आणून दाखवा : पंतप्रधान मोदी

मंडलिक-महाडिक मतभेद
कोल्हापुरातील शिवसेना-भाजप यांच्यातील विशेषतः भाजपचे कोल्हापूर दक्षिणचे उमेदवार अमल महाडिक आणि शिवसेना खासदार प्रा. संजय मंडलिक यांच्यातील मतभेद आता चव्हाट्यावर आले आहेत. लोकसभा निवडणुकीत काँग्रेस नेते आमदार सतेज पाटील यांनी आपलं ठरलंय, असा संदेश देत राष्ट्रवादीचे उमेदवार धनंजय महाडिक यांच्याऐवजी शिवसेनेचे संजय मंडलिक यांना साथ दिली होती. आता मंडलिक यांनी किमान कोल्हापूर दक्षिण विधानसभा मतदारसंघासाठी तरी, युती धर्म मोडल्याचे दिसत आहे. यावरून भाजप प्रदेशाध्यक्ष चंद्रकांत पाटील यांनी नुकताच त्यांना इशारा दिला होता. 'एका लुगड्याने बाई म्हातारी होत नाही,' अशा शब्दांत त्यांनी मंडलिका यांना सुनावले होते. पण, मंडलिक यांनी चंद्रकांत पाटील यांचे वक्तव्य फारसे मनावर घेतले नसल्याचे दिसत आहे. 'लोकसभेत आमदार अमल महाडिक यांनी कुठं माझ्यासाठी प्रचार केला होता,' अशी भूमिका प्रा. मंडलिक यांनी घेतल्याचे समजते. 

पंकजा मुंडे यांच्या जाहीर सभेत गोंधळ

काय आहे पार्श्वभूमी?
लोकसभा निवडणुकीत प्रा. संजय मंडलिक यांच्या रुपाने शिवसेनेला कोल्हापुरातून पाहिला खासदार मिळाला. शिवसेना-भाजपची एकत्रित ताकद आणि काँग्रेसचे नेते सतेज पाटील यांच्या मदतीच्या जोरावर मंडलिक यांचा विजय साकार झाला. त्यांच्या विरोधात त्यावेळी राष्ट्रवादीचे धनंजय महाडिक रिंगणात होते. आता महाडिक यांनी भाजपमध्ये प्रवेश केला आहे. तर, त्यांचे चुलत भाऊ अमल महाडिक कोल्हापूर दक्षिणमधून निवडणूक रिंगणात आहेत. धनंजय महाडिक राष्ट्रवादीकडून रिंगणात असताना, अमल महाडिक भाजपमध्येच होते. त्यावेळी त्यांनी युती धर्म पाळला नाही. त्यांनी मंडलिक यांच्या प्रचारासाठी महायुतीच्या एकाही व्यासपीठावर उपस्थिती लावली नव्हती. त्यामुळे आता विधानसभा निवडणुकीत खासदार मंडलिक त्यांच्या व्यासपीठावर दिसत नाही. लोकसभेला काँग्रेस आमदार सतेज पाटील यांनी प्रा. मंडलिक यांना रसद पुरवली होती. आता सतेज पाटील यांचे पुतणे ऋतुराज कोल्हापूर दक्षिण मधून विद्यमान आमदार अमल महाडिक यांच्या विरोधात रिंगणात आहेत. त्यामुळे खासदार मंडलिक तटस्थ राहून लोकसभेच्या मदतीची परतफेड करत असल्याची चर्चा कोल्हापूरच्या राजकीय वर्तुळात आहे.