'रोहित दादांना तिकीट द्या', या गावकऱ्यांच्या मागणीवर शरद पवार म्हणतात…

सकाळ वृत्तसेवा
सोमवार, 13 मे 2019

- 'रोहित दादांना तिकीट द्या ते नक्की निवडून येतील'
- जामखेड विधानसभा मतदारसंघातल्या गावकऱ्यांची मागणी
- राष्ट्रवादीचे नेते शरद पवार यांच्याकडे मागणी
- रोहित तुझी मागणी झाली बघ शरद पवारांचे उत्तर

जामखेडः 'रोहित दादांना तिकीट द्या ते नक्की निवडून येतील', अशी मागणी जामखेड विधानसभा मतदारसंघातल्या गावकऱ्यांनी राष्ट्रवादीचे नेते शरद पवार यांच्याकडे केली. त्यावर हसून रोहित तुझी मागणी झाली बघ असं शरद पवार रोहित पवार यांना म्हटले.

सध्या जामखेड मतदारसंघात भाजपचे कॅबिनेट मंत्री राम शिंदे हे विद्यमान आमदार आहेत. गावकऱ्यांनी केलेली मागणी शरद पवारांनी मान्य केली आणि रोहित पवार यांनी जामखेडमधून लढण्याची तयारी दाखवली तर जामखेडमध्ये राम शिंदे विरूद्ध रोहित पवार असा सामना विधानसभेच्या वेळी पहायला मिळू शकतो. शरद पवार आणि रोहित पवार हे जामखेडमध्ये आहेत. तेव्हा काही शेतकऱ्यांनी त्यांचं स्वागत केलं, त्यावर शरद पवारांनी दुष्काळ असताना स्वागत कसलं करता? तुमचं म्हणणं काय आहे ते सांगा असं म्हटलं. त्यानंतर शेतकऱ्यांनी त्यांच्यापुढे आपलं गाऱ्हाणं मांडलं.

दरम्यान, लोकसभा निवडणुकीची महाराष्ट्रातील रणधुमाळी संपल्यानंतर शरद पवारांनी राज्याचा दुष्काळी दौरा सुरू केला आहे. त्यांच्यासोबत त्यांचे नातू रोहित पवारही आहेत. रोहित पवार आणि शरद पवार हे सध्या एकत्र महाराष्ट्रातील दुष्काळी भागातील दौऱ्यावर आहेत.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Villagers Demands Rohit Pawars Nomination For Assembly Election To Sharad Pawar