`या` स्मार्ट सिटीचा महापौर कोणत्या प्रवर्गाचा आज ठरणार 

`या` स्मार्ट सिटीचा महापौर कोणत्या प्रवर्गाचा आज ठरणार 

सोलापूर ः स्मार्ट सिटीचा आगामी महापौर कोणत्या प्रवर्गातील असेल याचा निर्णय  आज बुधवारी होणार आहे. दरम्यान, या पदासाठीच्या दावेदारांनी आपले देव पाण्यात ठेवले असून, देवाने कोणाला कौल दिला हे दुपारी तीननंतर मुंबईत स्पष्ट होणार आहे. 

महाराष्ट्र राज्यातील 27 महापालिकांतील महापौर पदाचे आरक्षण आज काढण्यात येणार आहे. नगर विकास विभागाचे मुख्य सचिवांच्या अध्यक्षतेखाली सहाव्या मजल्यावरील परिषद सभागृहात दुपारी तीन वाजता सोडत काढण्यात येणार आहे. सोडतीवेळी महापौर, स्थायी समिती सभापती आणि सभागृह नेत्यांना उपस्थित राहण्याचे पत्र नगर विकास विभागाचे अवर सचिव सचिन सहस्त्रबुद्धे यांनी राज्यातील सर्व महापालिकांच्या आयुक्तांना पाठवले आहे. 

सोलापूर महापालिकेत सध्या सर्वसाधारण महिलेसाठी आरक्षण आहे. विद्यमान महापौर शोभा बनशेट्टी यांची मुदत गत सात सप्टेंबरलाच संपली. मात्र, विधानसभा निवडणुकीच्या पार्श्‍वभूमीवर त्यांना तीन महिन्यांची मुदतवाढ मिळाली. त्यामुळे आता त्यांची मुदत सात डिसेंबर रोजी संपणार आहे. अलका राठोड, प्रा. सुशीला आबुटे आणि सौ. बनशेट्टी यांच्या रूपाने गेली साडेसात वर्षे महापौरपदी "महिलाराज'च होते. त्यामुळे यंदा तरी पुरुषांना संधी मिळेल, असा आशावाद नगरसेवकांतून व्यक्त होत आहे. यंदाचे आरक्षण सर्वसाधारण, इतर मागासवर्गीय, अनुसूचित जाती किंवा अनुसूचित जमातीसाठी निघेल, अशी शक्‍यता व्यक्त होत आहे. सर्वसाधारण प्रवर्गासाठी आरक्षण निघाले तर विद्यमान महापौर सोडल्या तर उर्वरित 48 जण इच्छुक आहेत. त्यामुळे महापौरपदाचा उमेदवार ठरविताना आम्हाला तारेवरची कसरत करावी लागेल. तथापि पद्मशाली समाजातील नगरसेवकाला महापौरपदाची संधी देण्यासाठी प्राधान्य असेल, असे भाजपच्या कोअर कमिटीतील सदस्याने "सकाळ'ला सांगितले.

महापौरपदासाठी डॉ. किरण देशमुख, नागेश वल्याळ, राजेश काळे, अनुसूचित जातीसाठी आरक्षित झाल्यास प्रा. नारायण बनसोडे, रवी गायकवाड, संगीता जाधव, वंदना गायकवाड यांच्या नावाचा विचार होऊ शकतो. कुणाच्या नावाला प्राधान्य द्यायचे हे आरक्षण निश्‍चित झाल्यावरच ठरणार आहे. 

सोलापूर महापालिकेचे गत तीन टर्ममधील आरक्षणे 
2002-05 सर्वसाधारण महिला नलिनी चंदेले (कॉंग्रेस) 
2005-07 ओबीसी विठ्ठल जाधव (कॉंग्रेस) 
2007-09 सर्वसाधारण महिला अरुणा वाकसे (कॉंग्रेस) 
2009-12 सर्वसाधारण आरिफ शेख (कॉंग्रेस) 
2012-14 ओबीसी महिला अलका राठोड (कॉंग्रेस) 
2014-17 अनुसूचित जाती महिला प्रा. सुशीला आबुटे (कॉंग्रेस) 
2017-19 सर्वसाधारण महिला शोभा बनशेट्टी (विद्यमान - भाजप)  

 
 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com