तीन महिलांना सभापतिपदाची संधी शक्‍य

सातारा - पालिकेत नगराध्यक्षा माधवी कदम यांच्या साथीला शहराचा कारभार सांभाळण्यासाठी तीन महिला सदस्यांची विविध विषय समित्यांच्या सभापतिपदी वर्णी लागणार आहे. त्यामध्ये सुमती खुटाळे, सविता फाळके, तसेच सुनीता पवार यांच्या नावांची चर्चा आहे. दरम्यान, जिल्हाधिकारी कार्यालयात महिन्यापूर्वी राजीनामा सादर करूनदेखील नव्याने निवडीचा मुहूर्त लागत नसल्याने पालिकेच्या विविध विभागांच्या विषय समितीच्या बैठकांना खो बसला आहे.

सातारा विकास आघाडीचे नेते खासदार उदयनराजे भोसले यांनी लोकसभा निवडणुकीच्या कालावधीत विविध विषय समितीच्या सभापतींना मुदतवाढ दिली. लोकसभा निवडणूक संपताच महिन्यापूर्वी खासदार भोसले यांनी पालिका कार्यक्षेत्रात बदल करण्यास प्रारंभ केला. त्यामध्ये स्वीकृत सदस्य, विविध विषय समितींच्या सभापतींचे, तसेच उपाध्यक्षपदाचा राजीनामा घेण्यात आला.

त्यानंतर उपाध्यक्षपदाची, तसेच स्वीकृत सदस्यांची निवड झाली. आता सभापतिपदांच्या निवडीचे सदस्यांना वेध लागले आहेत. नव्याने संभाव्य सभापती म्हणून नियोजन समिती सुमती खुटाळे, बांधकाम समिती सविता फाळके, महिला व बाल कल्याण सुनीता पवार, आरोग्य समिती विशाल जाधव यांची नावे निश्‍चित होतील, अशी सातारा विकास आघाडीत चर्चा आहे.

दरम्यान, वृक्ष व संवर्धन समितीमधील सदस्य प्रशांत आहेरराव यांची वर्णी स्वीकृत सदस्य म्हणून झाली आहे. त्यामुळे वृक्ष समितीमध्ये नगरसेवक आहेरराव यांच्या जागेवर नव्या दमाच्या कार्यकर्त्यास संधी मिळेल, अशी शक्‍यता वर्तवली जात आहे.