कवठेपिरान मैदानात माऊली जमदाडेची गणेश जगतापवर मात...

सांगली - कवठेपिरान (ता. मिरज) येथे श्री सप्तर्षी (सातसय्यद) यात्रेनिमित्त आयोजित मैदानात माऊली जमदाडेने बाजी मारली. प्रथम क्रमांकाच्या कुस्तीत त्याने गणेश जगतापला अवघ्या पाच मिनिटात पोकळ घिस्सा डावावर चितपट केले. हिंदकेसरी दीनानाथसिंह व माजी जिल्हा परिषद सदस्य भीमराव माने यांनी पंच म्हणून काम पाहिले. सांगली, सातारा, कोल्हापूर जिल्ह्यातील मल्लांच्या लढती झाल्या. शौकिनांची गर्दी होती.

दुसऱ्या क्रमांकाच्या लढतीत किरण शिंदेने आकडी डावावर विराप्पा अथगीला तिसऱ्या मिनिटाला आस्मान दाखवले. कवठेपिरानच्या प्रवीण साळुंखेने शुभम पवारवर पोकळ घिस्सा डावावर विजय मिळवला. सरदार सावंत, बाळू अपराध, मारूती सूर्यवंशी, अरविंद सावर्डे, प्रमोद येवले, कृष्णात येवले, नीलेश पाटील, योगेश पाटील, सुनील करवते, भूषण पवार यांच्यासह कुस्तीपटूंनी नेत्रदीपक कुस्त्या करून दाद मिळवली.
कुस्तीगीर परिषदेचे कार्याध्यक्ष नामदेवराव मोहिते, पोलिस निरीक्षक चद्रकांत बेंदरे, गौरव नायकवडी, सागर पाटील, कुस्ती कमिटीचे अध्यक्ष भीमराव पाटील, पोपट पाटील, विनोद देसाई, प्रभाकर देसाई, सुनील विधाते उपस्थित होते. बंडा सायमोते, उदय खंबाळे, जालिंधर दिंडे, अर्जुन वडगावे, अमोल  खंबाळे, रधुनाथ दिंडे, बंडा तामगावे, पिराजी माळी,  मकान गवळी यांनी पंच म्हणून काम पहिले. शंकर पुजारी, जोतीराम वाजे, रामदास गायकवाड यांनी निवेदन केले.