कोरोनात भूकेल्यांना घास भरवून 'ती' देतीय आधार

जुनी सांगवी- कोरोनाचा (corona) संकटकाळ व मिनीलॉकडाऊनमुळे सर्वांचीच घडी विस्कळीत झाली आहे. यातच सर्वाधिक झळ कष्टक-यांना सोसावी लागत आहे. यात पदपथावरील विक्रेते ते बांधकाम मजूर कष्टकरी वर्ग पिचला आहे. अशा कष्टकरी वर्गासाठी विविध उपक्रम राबवत पिंपळे गुरव येथील आदिती निकम (aditi nikam) या छोट्या छोट्या सामाजिक उपक्रमातून गरजूंना मदत करत दिलासा देण्याचे परिसरात काम करत आहेत. पदपथावर, चौकांमधून कॅरिबॅग विक्री करणा-यांसाठी स्वत: कॅरीबॅग विकून आलेले पैसे त्या गरजूंना देतात. तर परिसरातील कुणीही कष्टकरी उपाशी राहू नये यासाठी जिवनाश्यक शिधा,अन्नदान देत परिसरातील कष्टक-यांना आधार देत आहेत.

मातृदिनानिमित्त जुनी सांगवी येथील वेताळ महाराज उद्यान परिसरातील पत्राचाळ येथील राहणा-या कष्टक-यांच्या मुलांची आरोग्य तपासणी करण्यात आली. डॉक्टर,नाभिक कारागिरांना सोबत घेवून जात त्यांनी लॉकडाऊनच्या केशकर्तनालयावरील निर्बंधांमुळे वाढलेले केस व स्वच्छतेबाबत महत्त्व पटवून दिले. त्यांना मास्कचा वापर करणे, सुरक्षित अंतर ठेवणे, वेळोवेळी हात स्वच्छ धुणे स्वच्छतेबाबत काळजी घेण्यासाठी प्रबोधन करण्यात आले. तर कोरोनामुळे केशकर्तनालय बंद असल्याने येथील केस वाढलेल्या बालकांची कारागिरांनी सर्व खबरदारी घेत कटिंग केली. या आगळ्या वेगळ्या उपक्रमात येथील आदिलक्ष ग्रुप, डॉ.चंदन लोखंडे, नाभिक कारागिर श्रावण सुर्यवंशी, शिवा काकडे यांनी या उपक्रमात योगदान केले.