पिंपरी - शहरात मोकाट कुत्र्यांनी धुमाकूळ घातला आहे. आता पाळीव कुत्रेही चावत असल्याची घटना समोर आली आहे. दापोडीतील बापू काटे चाळीतील प्रणव प्रफुल्ल गायकवाड या सहा वर्षीय मुलावर कुत्र्याने प्राणघातक हल्ला केला. लचक्यात त्याच्या कानाचा तुकडा पडला असून, उपचारासाठी ससून रुग्णालयात दाखल केले आहे.
गुरुवारी (ता. ४) सायंकाळी पाच वाजता प्रणव अंगणात मित्रांसोबत खेळत होता. तेवढ्यात शेजारील विक्रम कांबळे यांच्या पाळीव कुत्र्याने त्याच्यावर झडप घातली. आकस्मिक हल्ल्यामुळे त्याच्यासह मित्र किंचाळू लागल्याने आजूबाजूच्या लोकांनी धाव घेतली. त्याला कुत्र्याच्या तावडीतून सोडविले.
- पुण्याच्या बातम्या वाचण्यासाठी येथे ► क्लिक करा
तोपर्यंत त्याच्या हातापायाचा, कानाचे चावे घेतले होते. हल्ला इतका जोरदार होता की, काही काळ नागरिकही पुढे जाण्यास धजावले नाहीत. तरीही काहींनी धाडसाने प्रणवची सुटका केली. त्याच्या हातापायावर खोलवर जखमा झाल्या असून, कानाचा तुकडा पडला आहे. सुरुवातीला औंध रुग्णालयात हलविले; परंतु डॉक्टर नसल्यामुळे तेथे उपचार होऊ शकले नाहीत. त्यामुळे त्याला ससून रुग्णालयात हलविले. तिथे तात्पुरते उपचार करून घरी आणले आहे. आता पुन्हा त्याच्यावर उपचार सुरू करण्यात येणार आहेत. श्वानमालक कांबळे यांच्या विरोधात भोसरी पोलिसमध्ये तक्रार नोंद झाली आहे.
कोवळ्या वयात मरणयातना
प्रणव हा बोपोडीतील राजेंद्रप्रसाद इंग्लिश मीडियम स्कूलमध्ये पहिलीत शिकतो. त्याच्या कुटुंबाची परिस्थिती बेताची असून, उपचाराचा खर्च न पेलवणारा आहे. अद्याप कान तज्ज्ञांनी तपासणी केलेली नाही. सोमवारी (ता. ८) उपचारांसाठी बोलविले आहे. त्यानंतरच कानाच्या आतील बाजूस किती प्रमाणात इजा झाली आहे, याचे निदान होईल.
Edited By - Prashant Patil
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.