प्रेमात अडथळा ठरल्याने जुन्या प्रियकराचा खून

चाकण : प्रेमात अडथळा ठरत असलेल्या जुन्या प्रियकराचा नव्या प्रियकराच्या मदतीने खून केल्याचा प्रकार भांबोली (ता. खेड) येथे उघडकीस आला. याबाबत चाकणचे वरिष्ठ पोलिस निरीक्षक अरविंद पवार यांनी माहिती दिली की, भांबोली येथे इलाईट कंपनीच्या जवळील मोकळ्या जागेत गुरुवारी (ता. २९) संजय वासुदेव पाटील (वय ४०, सध्या रा. चाकण, आगरवाडी रोड, शिक्षक कॉलनी, ता. खेड) या व्यक्तीचा डोक्यात दगड घालून व लोखंडी पाईपने मारहाण करून निर्घृणपणे खून करण्यात आला.

याबाबत प्रतिभा संजय पाटील (वय २९, सध्या रा. चाकण, मुळगाव-पथराट, ता. जि. जळगाव) यांनी पोलिसांत फिर्याद दिली. याप्रकरणी आरोपी नेहा रोहिदास जाधव (वय १९, रा. आंबेठाण, ता. खेड), प्रेम उघडे, प्रतीक उघडे (दोघेही रा. भांबोली फाटा, ता. खेड) यांच्यावर गुन्हा दाखल केला असून, नेहा हिला अटक केला आहे. संजय व नेहा यांचे पूर्वी प्रेमसंबंध होते. सध्या नेहा व प्रेम उघडे यांचे प्रेम सुरू होते. त्यात संजय पाटील हा अडथळा ठरत होता. त्यामुळे त्यांनी कट रचून त्याला निर्जनस्थळी नेऊन डोक्यात दगड घालून लोखंडी पाईपने मारहाण करून त्याचा खून केला.