माउलींच्या पालखीचे जल्लोषात स्वागत

भोसरी, ता. २० ः माझा भाव या पदरी । घेई पांडुरंग ठायी ।। पावन होईन तयातें । आळंदीसी परतताना ।। या आस्थेने मनातील भक्तिभाव पंढरपूरला पांडुरंगाच्या चरणी अर्पण करून शुद्ध अंतकरणाने वारकरी आळंदीला निघाले होते. सोबत होता, संतश्रेष्ठ ज्ञानेश्‍वर महाराज यांचा पालखी सोहळा.
आषाढी वारी करून आळंदीकडे परतीच्या प्रवासात असलेल्या संत ज्ञानेश्‍वर माउली यांचा पालखी सोहळा रविवारी दिघीत पोहोचला. दुपारी अडीच वाजता पालखीचे विठ्ठल मंदिरात आगमन झाले. दिघी ग्रामस्थांनी पादुका पूजनासह आरती केली. पाऊणतास पालखीने विश्रांती घेतली. ग्रामस्थांद्वारे विठ्ठल मंदिरात वारकऱ्यांना महाप्रसादाचे वाटप केले. सायंकाळी सव्वाचार वाजता वडमुखवाडीतील थोरल्या पादुका मंदिराजवळ पालखीचे आगमन झाले. संत ज्ञानेश्वर महाराजांच्या पादुकांची विधीवत पूजा ट्रस्टद्वारे करण्यात आली. श्री संत ज्ञानेश्वर महाराज पालखी सोहळ्याचे प्रमुख डॉ. भावार्थ देखणे, संस्थानचे प्रमुख विश्वस्त योगी निरंजननाथ, विश्वस्त ॲड. राजेंद्र उमाप, ॲड. रोहिणी पवार, चैतन्य महाराज लोंढे, पुरुषोत्तम महाराज पाटील, पालखी मालक बाळासाहेब आरफळकर, राजेंद्र आरफळकर, चोपदार आदींचा सत्कार ट्रस्टचे विश्वस्त ॲड. विष्णू तापकीर यांच्या हस्ते केला.

मंदिराला सजावट
संत ज्ञानेश्वर महाराज आणि संत तुकाराम महाराज यांच्या पालखीच्या आगमनानिमित्त सामाजिक कार्यकर्ते संतोष तानाजी वाळके, कै. तानाजी सोपानराव वाळके प्रतिष्ठान, कै. सुजाता एकनाथ वाळके प्रतिष्ठानद्वारे वडमुखवाडीतील थोरल्या पादुका मंदिरावर आकर्षक फुलांची सजावट केली होती. भाविकांनी महाप्रसादाचे वाटपही झाले.

भाविकांची गर्दी; चोख बंदोबस्त
वडमुखवाडीतील थोरल्या पादुका मंदिरात माउलींच्या पालखीचे दर्शन घेण्यासाठी भाविकांनी प्रचंड गर्दी केली होती. यावेळी दिघी पोलिसांनीही चोख बंदोबस्त ठेवला होता. त्यामुळे भाविकांचे दर्शन सुकर झाले.