लोणावळ्यामध्ये मुलाचा विजेच्या धक्क्याने मृत्यू

लोणावळा, ता. २९ः जलतरण तलावालगतच्या विजेच्या खांबाला हात लागल्याने पर्यटनासाठी आलेल्या १३ वर्षीय मुलाचा मृत्यू झाला. गुरुवारी (ता. २८) रात्री साडेआठच्या सुमारास तुंगार्ली येथील क्रेसेंन्ट व्हिला येथे ही घटना घडली. हरुन मसुद वाली (वय-१३, रा. मुंबई) असे मृत झालेल्या मुलाचे नाव आहे. याप्रकरणी मोहमद साजीद खान (वय-५६, रा. भायखळा, मुंबई) यांनी पोलिसांत खबर दिली. मोहमद खान हे पत्नी, सासरे, मेहुणी, साडू व मुलांसह लोणावळ्यात पर्यटनासाठी आले होते. तुंगार्ली येथील क्रेसेंन्ट व्हिला या बंगल्यात त्यांचे वास्तव्य होते. रात्री साडेआठच्या सुमारास खान व त्यांच्या साडूची मुले तलावात पोहत होती. त्यावेळी हरुन याचा तलावाशेजारील विजेच्या खांबास हात लागला. त्यामुळे तो बेशुद्ध झाला. त्याला तातडीने येथील खासगी रुग्णालयात दाखल केले.मात्र, डाॅक्टरांनी त्यास मृत घोषित केले.