लोणावळ्यात १८ शाळांना शालेय साहित्याचे वाटप

लोणावळा, ता. ६ : बंध मैत्रीचे व निर्मिती फाऊंडेशनच्यावतीने १८ शाळांना शालेय साहित्य वाटप करण्यात आले. येथील सामाजिक कार्यकर्त्या व निर्मिती फाउंडेशनच्या अध्यक्षा डॉ. सीमा शिंदे यांनी याबाबत पुढाकार घेतला. कुसगाव बुद्रूक विभागातील जिल्हा परिषदेच्या १७ शाळांमधील ५११ विद्यार्थ्यांसह रायगड जिल्ह्यातील दुर्गम उंबरविरा येथील विद्यार्थांना सुमारे साडेसहा लाख रुपयांचे शालेय साहित्य वाटप करण्यात आले. डॉ. सीमा शिंदे, कुसगावच्या सरपंच अश्विनी गुंड, उपसरपंच सूरज केदारी, आपटी गावच्या सरपंच अनिता शिळवणे, ग्रा.पं. सदस्य राजेश काटकर, फरीन शेख, गणेश गुंजाळ, उद्योजक गिरीश पारेख, सामाजिक कार्यकर्ते योगेश लोहार, ज्ञानेश्वर गुंड, केंद्र प्रमुख मुकुंद तनपुरे, मुख्याध्यापिका आशा मानकर आदी उपस्थित होते. कुसगाव बु. जिल्हा परिषद शाळेत गटविकास अधिकारी सुधीर भागवत यांच्या उपस्थितीत या उपक्रमाचा समारोप झाला. या वेळी मुलांना मातीला आकार देण्याचे काम कसे चालते, याची माहिती व्हावी याकरिता एक स्वयंचलित कुंभार चाक (पॉटरी मशिन) भेट देण्यात आले. महादेव शेलार यांनी सूत्रसंचालन केले. सहादू मानकर यांनी आभार मानले.