मारहाण करून मोटार पळविणारे दोघे अटकेत

पिंपरी, ता. ३ : चालकाला मारहाण करून मोटार पळविणाऱ्या दोघांना हिंजवडी पोलिसांनी अटक केली. प्रकाश हरीराम यादव (वय २६, रा. रहाटणी फाटा, काळेवाडी), विशाल दामोदर पिल्ले (वय २४, रा. डांगे चौक, वाकड) अशी त्यांची नावे आहेत. फिर्यादी प्रवीण शंकर यादव (मोहननगर, चिंचवड) शनिवारी मध्यरात्री एकच्या सुमारास मोटारीतून डांगे चौकाकडून हिंजवडीकडे जात होते. भूमकर चौकापुढे आरोपी दुचाकीवरून त्यांच्या समोरून आले. गाडीला धडक दिल्याचा बहाणा करून त्यांच्याशी वाद घातला. फिर्यादी तेथून गेले असता लक्ष्मी चौक येथे फिर्यादीला मारहाण करून त्यांच्याकडील मोटार आरोपींनी पळवली. याप्रकरणी हिंजवडी पोलिस ठाण्यात गुन्हा दाखल होता. सीसीटीव्ही फुटेज व तांत्रिक विश्लेषणावरून आरोपींना पोलिसांनी अटक केली.