देहूरोडमध्ये पाणीपुरवठा सुरळीत करण्याची मागणी

देहूरोड, ता. ६ ः देहूरोड कँटोन्मेंट बोर्डाच्या हद्दीतील गांधीनगर, आंबेडकरनगर आणि पंडितचाळ या भागात पिण्याच्या पाण्याचा पुरवठा दिवसाला केवळ दहा मिनिटे होत आहे. कँटोन्मेंट बोर्डाने नागरिकांना सुरळीत पाणीपुरवठा अन्यथा आंदोलन करण्यात येईल, असा इशारा पीपल्स रिपब्लिकन पक्षाचे अध्यक्ष परशुराम दोडमणी यांनी निवेदनाद्वारे दिला आहे.

गांधीनगर, पंडितचाळ आणि आंबेडकरनगर येथे झोपडपट्टी आहे. या झोपडपट्टीलगतच बोर्डाची स्वतंत्र पाणीपुरवठा योजना आहे, तरीही या भागात दिवसाला दहा ते पंधरा मिनिटे पुरवठा होतो. त्यामुळे येथील नागरिकांचे हाल होत आहेत. या ठिकाणी पूर्वी सकाळी सात ते सकाळी दहा, असा पाणीपुरवठा होत होता. त्यामुळे पूर्वीप्रमाणेच पुरवठा सुरळीत करावा, अशी मागणी दोडमणी यांनी बोर्डाच्या मुख्य कार्यकारी अधिकाऱ्यांकडे केली आहे.