माजी नगरसेवकाच्या मुलाला कोयत्याने मारहाण

पिंपरी, ता. १० : माजी नगरसेवकाच्या मुलाला कोयत्याने मारहाण केल्याप्रकरणी दुसऱ्या माजी नगरसेवकाच्या मुलावर गुन्हा दाखल झाला आहे. हा प्रकार चिंचवडगावातील भोई आळी येथे घडला. सूरज हरिभाऊ तिकोने (वय २७, रा. दत्तनगर, थेरगाव) असे जखमीचे नाव आहे. याप्रकरणी प्रशांत आगज्ञान (रा. भोई आळी, चिंचवड) याच्यावर गुन्हा दाखल असून त्याचा साथीदार अक्षय सूर्यवंशी (वय २५) याला पोलिसांनी अटक केली आहे. सूरज माजी नगरसेवक हरिभाऊ तिकोने यांचा मुलगा आहेत. तर प्रशांत माजी नगरसेवक नागेश आगज्ञान यांचा मुलगा आहे. शनिवारी (ता. ७) ऋषिकेश सावंत याच्याशी झालेल्या भांडणावरून रविवारी (ता.८) रात्री साडे आठच्या सुमारास प्रशांत याने सूरज यांना कोयत्याने मारहाण केली. तर अक्षयने लाथाबुक्क्यांनी मारहाण करून जखमी केले. चिंचवड पोलिस अधिक तपास करीत आहेत.