मामुर्डी परिसरात डेंग्युचे रुग्ण

देहूरोड, ता. ११ः कॅटोन्मेंट बोर्डाच्या हद्दीतील मामुर्डी गाव आणि परिसरात डेंग्युचे रुग्ण आढळत आहेत. या पार्श्वभूमीवर देहूरोड कॅटोन्मेंट बोर्ड प्रशासन आणि आरोग्य विभागाने त्वरीत कार्यवाही करावी, अशी मागणी देहूरोड कॅटोन्मेंट बोर्डाचे नामनिर्देशित सदस्य अॅड. कैलास पानसरे यांनी कॅटोन्मेंट बोर्ड प्रशासनाकडे निवेदनाद्वारे केली आहे. मामुर्डी भागातील रुग्णांची तपासणी केली असता या रुग्णांना डेंग्युची लागण झाल्याचे निदर्शनास येत आहे. तसेच काही भागात गाळमिश्रीत पाणी पुरवठा होत असल्याने ४० ते ५० रुग्णांवर उपचार सुरु आहेत. त्यामुळे कॅटोन्मेंट बोर्ड प्रशासनाने त्वरीत या परिसरात खबरदारी घ्यावी, आठवड्यातून एक दिवस कोरडा दिवस पाळण्यात यावा, औषध फवारणी करावी, अशी मागणी कैलास पानसरे यांनी निवेदनात केली आहे.