शहरात विविध ठिकाणी वटपौर्णिमा उत्साहात

पिंपरी, ता. १४ ः ‘जन्मोजन्मी हाच पती मिळो,’ अशी प्रार्थना करीत शहरातील महिलांनी वटपौर्णिमा पारंपरिक पद्धतीने उत्साहात साजरी केली. पिंपरी, चिंचवड, आकुर्डी, मासुळकर कॉलनी, भोसरी, कासारवाडी आदी भागांमध्ये असणाऱ्या वडाच्या झाडांची पूजा करण्यासाठी मंगळवारी (ता.१४) महिलांनी गर्दी केली. सुवासिनींनी वडाला धाग्याचे सात फेर बांधत पतीच्या दीर्घायुष्याची कामना केली. यावेळी वडाच्या झाडाची विधीपूर्वक आणि मनोभावे पूजा करून पतीच्या दिर्घायुष्यासाठी प्रार्थना करताना महिला दिसल्या. तसेच नोकरदार महिलांनी बाजारातून वडाची फांदी आणून घरीच ही पूजा केली. काही पुरुषांनी जन्मोजन्मी हीच पत्नी मिळावी म्हणून वडाला साकडे घालत पत्नी प्रती प्रेमभाव व्यक्त केला.