राष्ट्रवादी काँग्रेस पक्ष झोपडपट्टी सेलतर्फे भाजपचा निषेध

पिंपरी, ता. १६ : देहू येथील कार्यक्रमात राज्याचे उपमुख्यमंत्री अजित पवार यांना बोलू दिले नाही, या घटनेचा राष्ट्रवादी काँग्रेस पक्ष झोपडपट्टी सेलचे शहराध्यक्ष संतोष निसर्गंध यांनी प्रसिद्धी पत्रकाद्वारे जाहीर निषेध केला आहे.

जगद्गुरु संत तुकाराम महाराज शिळा मंदिराच्या लोकार्पण सोहळा पंतप्रधान नरेंद्र मोदी यांच्या हस्ते मंगळवारी (ता. १४) झाला. या कार्यक्रमास उपमुख्यमंत्री व पुणे जिल्ह्याचे पालकमंत्री अजित पवारही उपस्थित होते. ‘आपण केलेली विकासकामे जनतेसमोर सांगून भाजपला उघडे करणार,’ या भीतीने विरोधी पक्ष नेते देवेंद्र फडणवीस घाबरून गेले होते. त्यामुळेच अजित पवार यांना बोलू दिले नाही. हा सबंध महाराष्ट्राचा अवमान आहे. आगामी काळात भाजपला पिंपरी चिंचवड शहरातील झोपडपट्ट्यांमधून हद्दपार करूनच, या घटनेचा वचपा काढण्याचा निर्णय घेतला असल्याचे झोपडपट्टी सेलचे शहर अध्यक्ष निसर्गंध यांनी पत्रकात म्हटले आहे.
---------------------------