भोसरीत महिलेची ६५ लाखांची फसवणूक

पिंपरी, ता. २८ : गुंतवणूक करून जादा परताव्याचे आमिष दाखवत एका महिलेची ६५ लाख ७१ हजार रुपयांची फसवणूक करण्यात आली. हा प्रकार भोसरी येथे घडला. याप्रकरणी पोलिसांनी एकाला अटक केली असून पाच जणांवर गुन्हा दाखल केला. याप्रकरणी संबंधित महिलेने भोसरी पोलिस ठाण्यात फिर्याद दिली. त्यानुसार श्रीमंत रमाचार होलेहुन्नूर (रा. बेंगलोर, कर्नाटक) याला पोलिसांनी अटक केली असून श्रीमंत बजार (ओपीसी) ब्रॅंच ऑफ इनकेडिबल इंडिया, दिनेश भटनागर (रा. तिमरापूर, नवी दिल्ली), अशोक जाधव (रा. मोशी) व इतर आरोपींवर गुन्हा दाखल केला आहे. आरोपींनी ७५ दिवसांत ६० टक्क्यांहून अधिक नफा मिळवून देण्याचे आमिष फिर्यादीला दाखविले. त्यानुसार फिर्यादीने आरोपींकडे एकूण एक कोटी १२ लाख ५१ हजार ८४० रुपयांची गुंतवणूक केली. त्यातून आरोपींनी फिर्यादीस ४६ लाख ७९ हजार ९६० रुपयांचा परतावा दिला. उर्वरित ६५ लाख ७१ हजार रुपये रक्कम परत न करता फिर्यादीची फसवणूक केली.