भोसरीत पीएमपीएमएल बसवर दगडफेक

पिंपरी, ता. १० : पुणे महानगर परिवहन महामंडळाच्या (पीएमपीएमएल) बसला रस्त्यात अडवून बसवर दगडफेक केल्याप्रकरणी एकावर गुन्हा दाखल झाला आहे. हा प्रकार भोसरी येथे घडला. याप्रकरणी गोरक्षनाथ दत्तात्रेय सोनार (रा. आर्यन सोसायटी, राजगुरुनगर) यांनी फिर्याद दिली आहे. त्यानुसार एकावर गुन्हा दाखल झाला आहे. फिर्यादी व वाहक संजय जाठोट हे भोसरीहून पुणे स्टेशनला बस घेऊन जात होते. दरम्यान, भोसरी-आळंदी रोडवरील बनाचा ओढा येथे आरोपीने बस थांबवून रस्ता अडवला. त्यानंतर बसच्या पुढील काचेवर दोन दगड मारले. यामध्ये बसचे नुकसान झाले. भोसरी पोलिस अधिक तपास करीत आहेत.