फसवणूकप्रकरणी दोन जणांवर गुन्हा

पिंपरी, ता. ३० : कमी किमतीत फ्लॅट देतो, असे सांगून पैसे घेतले. मात्र, नंतर फ्लॅटचे खरेदीखत न करता व पैसेही परत न करता फसवणूक केल्याप्रकरणी दोघांवर गुन्हा दाखल झाला आहे. हा प्रकार पिंपळे गुरव येथे घडला.

या प्रकरणी एका महिलेने फिर्याद दिली आहे. त्यानुसार राहुल जयप्रकाश गायकवाड (रा. ओंकार रेसिडेन्सी, पिंपळे गुरव) याच्यासह एका महिलेवर गुन्हा दाखल झाला आहे. आरोपींनी त्यांचा बांधकाम व्यवसाय असल्याचे सांगत पिंपळे गुरव येथील मोरया गल्ली येथे साई लक्ष्मी व लक्ष्मी नारायण अशा दोन स्कीमचे बांधकाम सुरु असल्याचे सांगितले. तुम्ही लगेच पैसे दिले तर मी तुम्हाला कमी किमतीत फ्लॅट देतो, असे फिर्यादीला सांगून वेळोवेळी रोख व धनादेशाद्वारे फिर्यादीकडून वीस लाख रुपये घेतले. मात्र, अद्यापपर्यंत फ्लॅटचे खरेदीखत करून दिले नाही. अथवा फिर्यादीने दिलेली रक्कम परत न करता त्यांची फसवणूक केली. तसेच सिक्युरिटी डिपॉझिट म्हणून दिलेले वीस लाखांचा धनादेश बाउंस केला. सांगवी पोलिस अधिक तपास करीत आहेत.
------------------