शहरात सात पिस्तूल, नऊ जिवंत काडतुसे जप्त
पिंपरी, ता. ३० : पिंपरी-चिंचवड पोलिसांच्या गुन्हे शाखेने केलेल्या तीन वेगवेगळ्या कारवाईत सात पिस्तूल व नऊ जिवंत काडतुसे जप्त केली. याप्रकरणात सहा जणांना अटक केली आहे. गुन्हे शाखा युनिट चारच्या पथकाने दिघी पोलिस ठाण्याच्या हद्दीत चऱ्होली फाट्याजवळ केलेल्या कारवाईत अक्षय रवी पाखरे (वय २२, रा. पायगुडे वस्ती, म्हाळुंगे इंगळे), प्रवीण भारत म्हस्के (वय २०, रा. पिंपळे सौदागर) यांना अटक केली. त्यांच्याकडून एक लाख चार हजारांच्या दोन देशी बनावटीचे पिस्तूल व चार जिवंत काडतुसे जप्त केली. तसेच वाकड पोलिस ठाण्याच्या हद्दीत शेख वस्ती येथे केलेल्या कारवाईत तुषार महिपती मगर (वय २४, रा. शेडगेवस्ती, वाकड) याला अटक केली. त्याच्याकडून ५० हजारांचे एक देशी बनावटीचे पिस्तूल जप्त केले.
तसेच दरोडा विरोधी पथकाने आळंदी पोलिस ठाण्याच्या हद्दीत चाकण-आळंदी रोडवर कारवाई करून रामदास सुरेश सुकळे (वय ३९, रा. सरदार चौक, खेड), रियाज हुसेन शेख (वय २२, रा. पडाळी, ता. खेड), तुषार ऊर्फ डेल्या शांताराम टेके (वय २४, रा. वडगाव काशिंबे, ता. आंबेगाव) यांना अटक केली. त्यांच्याकडून एक लाख ७७ हजार ५५० रुपये किमतीची चार पिस्तूल व पाच जिवंत काडतुसे जप्त केली आहेत.
हे ही वाचा
