समाज विकास विभागासाठी १७१ कोटी ९७ लाख

पिंपरी : महापालिकेच्यावतीने समाज विकासविभागामार्फत महिला व बालकल्याण योजनेअंतर्गत महिला व युवतींसाठी उड्डाण, उमेद जागर या योजनांद्वारे रोजगार वाढीसाठी व उच्चशिक्षणासाठी मदतीचे उपक्रम राबविण्यात येणार आहेत. तर दिव्यांग, मागासवर्गीय व अन्य कल्याणकारी योजनाही कार्यान्वित राहणार आहेत. यासाठी १७१ कोटी ९७ लाख रुपयांची तरतूद सन २०२३-२०२४ च्या अर्थसंकल्पात केली असल्याची माहिती महापालिकेचे आयुक्त तथा प्रशासन शेखर सिंह यांनी मंगळवारी (ता. १४) दिली.

महिला बालकल्याण योजनेअंतर्गत उड्डाण योजना
- महिला संसाधन केंद्राद्वारे कौटुंबिक हिंसाचार, पीडित, घटस्फोटित
व अत्याचारित महिलांना एकाच ठिकाणी समुपदेशन, कायदेशीर सल्ला, वैद्यकीय सुविधा
- युवतींना परदेशी उच्च शिक्षणासाठी अर्थसाहाय्य
- स्पर्धा परिक्षा देणाऱ्या युवतींना शासकीय, खासगी संस्थांमध्ये प्रवेश, अर्थ साहाय्य
- किशोर वयीन मुली व महिलांचे आरोग्य सुधारण्यासाठी सोई-सुविधा देणे
- महिलांना ज्ञान कौशल्य, वाढ प्रशिक्षण व प्रगत प्रशिक्षण
- शहरातील नोकरी करणाऱ्या व शिक्षण घेणाऱ्या महिला वसतीगृहात राहत असल्यास अर्थसाहाय्य

उमेद जागर
- कोरोना काळातील विधवा महिला बचत गट स्थापन करून त्यांना प्रशिक्षण
व रोजगार उपलब्ध करून देण्यासाठी स्टीचिंग युनिट
- व्यवसायासाठी लागणारी साधनसामुग्री व भांडवल उपलब्ध करून देणे
- महिला उत्पादित मालासाठी शासकीय व खासगी बाजारपेठ निर्माण करून देणे
- विधवा व अनुसूचित जाती, जमातीच्या महिलांसाठी राखीव असलेल्या निवासस्थानाचा काही भाग
नोकरदार महिलांसाठी ‘सावित्रीबाई फुले कामगार वसतिगृह’ म्हणून देण्याचे नियोजन
- महाराष्ट्र सरकारच्या ‘लेक लाडकी’ योजनेप्रमाणे महापालिकेमार्फत तेवढीच रक्कम देण्यात येणार

दिव्यांग कल्याणकारी
- शहरातील सर्व दिव्यांग नागरिकांचे सर्वेक्षण करणे
- ० ते ६ वयोगटातील मुलांचे लवकर निदान व लवकर उपचारासाठी प्रणाली विकसित करणे
- शहरातील सर्व दिव्यांग नागरिकांसाठी थेरपी युक्त, समुपदेशन केंद्र व सर्व उपचार केंद्र
- सेन्सरी गार्डनसह सर्व सोई-सुविधा युक्त राज्यातील पहिले दिव्यांग भवन
- शहरातील विशेष मुलांसाठी निरामय आरोग्य योजनेच्या विम्याची रक्कम महापालिकेमार्फत अदा करणार
- महापालिका हद्दीतील दिव्यांग नागरिकांसाठी सक्षमीकरण, सामाजिक समावेशन करण्यासाठी प्रगत प्रशिक्षण

मागासवर्गीय कल्याणकारी
- शहरातील युवक, युवतींना देशांतर्गत, परदेशी शिक्षणासाठी अर्थसाहाय्य
- इयत्ता ५ वी ते १० वीच्या विद्यार्थ्यांसाठी शिष्यवृत्ती
- मागासवर्गीय युवक, युवतींना विविध व्यवसाय, प्रगत प्रशिक्षण
- मागासवर्गीय विद्यार्थ्यांसाठी स्पर्धा परीक्षेसाठी पुस्तक संच वाटप
- शालेय विद्यार्थी, विद्यार्थिनींसाठी सायकल वाटप

अन्य कल्याणकारी
- ज्येष्ठ नागरिक दिनाचे आयोजन
- ज्येष्ठ नागरिक विरंगुळा केंद्रात उपयोगी वस्तूंचे वाटप
- तृतीयपंथी आंतरराष्ट्रीय दिनाचे आयोजन
- वय वर्षे ५० वरील तृतीय पंथीयांना पेन्शन व रोजगार उपलब्ध करून देणे
- बेघर निवारा केंद्रात साहाय्य
- १० वी व १२ वीच्या शालेय विद्यार्थ्यांना प्रोत्साहनात्मक बक्षिस रक्कम
- शहरातील एचआयव्ही बाधित मुलांचा सांभाळ करणाऱ्या पालकांना, संस्थांना अर्थसाहाय्य
- शहरातील १८ ते ३५ वयोगटातील युवक, युवतींना मोफत प्रशिक्षण देऊन लाइट हाऊस’ रोजगार निर्मिती उपक्रम
- शहरात दोन लाइट हाऊस प्रकल्प कार्यान्वित
- शहरात सहा लाइट हाऊस प्रकल्प प्रस्तावित