‘लांब पल्ल्याच्या रेल्वे गाड्या चिंचवड स्थानकात थांबा द्या’

पिंपरी, ता. १९ : पुढील काही महिने हे सुटीच्या कालावधीचे असून मोठ्या प्रमाणावर प्रवासी लांब पल्ल्याचा प्रवास करणार आहेत. मुंबई येथून सुटणाऱ्या व मुंबईकडे जाणाऱ्या सर्व लांब पल्ल्यांच्या गाड्यांना चिंचवड स्थानकात थांबा देण्यात येऊन प्रवाशांसाठी एक चांगली सुविधा तत्काळ उपस्थित करून देण्यात यावी, अशी मागणी केंद्रीय रेल्वे सल्लागार समिती सदस्यांनी रेल्वेच्या विभागीय व्यवस्थापक इंदू दुबे यांच्याकडे केली.
पुणे ते लोणावळा हे अंतर जवळपास ६५ किलोमीटर असून, या दोन स्थानकाच्या दरम्यान लांब पल्ल्यांच्या गाड्या कुठेही थांबत नाहीत. पुणे ते लोणावळा दरम्यानचे मध्यवर्ती स्टेशन म्हणून आपण चिंचवड स्थानकाच्या विचार केल्यास येथे किमान ४० लाखांच्या आसपास नागरिक राहत आहेत. या भागात मोठ्या प्रमाणावर कामगार वर्ग राहतो आहे. यातील बहुतांश कामगार वर्ग हा परराज्यातील असून त्यांना आपल्या गावी परत जाण्यासाठी किंवा परत येण्यासाठी दररोज हजारो प्रवासी या स्थानकातून मोठ्या प्रमाणावर प्रवास करीत आहेत. लांब पल्ल्यांच्या गाड्या पकडण्यासाठी त्यांना पुणे किवा लोणावळा स्थानकात जावे लागते, असे केंद्रीय रेल्वे सल्लागार समिती सदस्य बशीर सुतार व त्यांच्या सहकारी सदस्यांनी दुबे यांना भेटून दिलेल्या निवेदनात म्हटले आहे. ‘तुमच्या निवेदनाचा विचार करून नागरिकांच्या सोयीसाठी जे काय चांगले करता येईल ते आम्ही करू,’ असे आश्‍वासन दुबे यांना देण्यात आले. उप सरव्यवस्थापक मिलिंद हिरवे आदी उपस्थित होते.