महिलांचे पुनर्वसन करणाऱ्या ‘समर्पण’ला मदतीचा हात

पिंपरी, ता.१९ : पीडित, अत्याचारित आणि निराधार मुली व महिलांच्या पुनर्वसनासाठी काम करत असलेल्या अमरावती येथील ‘समर्पण संस्थे’ला मदतीचा हात देण्यासाठी पुणे व पिंपरी-चिंचवडमधील शिवांजली हेल्पिंग हॅंड्स ग्रुपने पुढाकार घेतला आहे. संस्थेच्यावतीने ११ मार्चला प्राधिकरणच्या ‘वीर सावरकर सभागृहात’ ‘तारांगण २०२३’ या कार्यक्रमात लोकसहभागातून संकलित केलेला चार लाख रुपयांचा निधी एचआयव्ही बाधित व दिव्यांग मुलींच्या प्रकल्पाच्या बांधकामासाठी हस्तांतरित करण्यात आला.
‘समर्पण’चे संस्थापक अमोल मानकर यांनी तो स्वीकारला. यावेळी सेवा संकल्प प्रतिष्ठानचे नंदकुमार पालवे, पालकपहाटच्या देवयानी गोविंदवार, वाल्हेकरवाडी रोटरी क्लबचे संस्थापक प्रदीप वाल्हेकर, आपण फौंडेशनचे मनोज गोविंदवार, सामाजिक कार्यकर्त्या आरती पालवे, पालवी संस्थेच्या डिंपल घाडगे आदी उपस्थित होते.
नंदकुमार पालवे यांनी स्वानुभवातून सामाजिक कार्याचे महत्त्व आणि समर्पण प्रतिष्ठान सारख्या संस्थांची समाजातील गरज याबाबत उपस्थितांना मार्गदर्शन केले. मनोज गोविंदवार यांनी दुसऱ्यांचे दु:ख कमी केल्याने आपले स्वत:चे दु:ख कमी होते. आनंदी जीवनाचे हेच सूत्र असल्याचे सांगितले. पालकपहाटच्या देवयानी गोविंदवार यांनी पालकांशी मनमोकळा संवाद साधत समाजातील सर्व प्रश्न पालकत्वातून निर्माण झाल्याचे मत व्यक्त केले. ओरगॅनो मार्टच्या वसुंधरा मुठाळ यांनी त्यांच्या कंपनीच्या प्रत्येक उत्पादनांच्या विक्रीतून प्राप्त होणाऱ्या नफ्यातील ठराविक रक्कम समर्पण प्रतिष्ठानला मदत म्हणून देण्याचे जाहीर केले. बाबासाहेब काळे यांनी प्रास्ताविक केले. सागर मिसाळ यांनी आभार मानले.