‘जात वैधता’ न दिल्याने अभियंत्याची पदावनती

पिंपरी, ता. ११ ः पदाचा अनुशेष भरून काढण्यासाठी आवश्यक असलेले जात प्रमाणपत्र सादर न केल्याने महापालिकेतील कार्यकारी अभियंत्याची उपअभियंता पदावर पदावनती करण्याचा आदेश प्रशासक शेखर सिंह यांनी दिला. शिरीष पोरेड्डी १९९१ पासून महापालिका सेवेत आहेत. एसटी आरक्षित पदावर कनिष्ठ अभियंता म्हणून ते रुजू झाले. २००७ मध्ये त्यांना उपअभियंता पदावर व २०२० मध्ये कार्यकारी अभियंता पदावर पदोन्नती मिळाली होती. मात्र, त्यांनी एक वर्षाच्या कालावधीत एसटीचे जात वैधता प्रमाणपत्र सादर करण्याचा आदेश २००७ मध्ये दिला होता. त्यांनी २००८ मध्ये एसबीसी जात वैधता प्रमाणपत्र सादर केले होते. त्यांना खुला प्रवर्गातून कार्यकारी अभियंता पदावर पदोन्नती मिळाली होती. मात्र, सरकारच्या २०१९ च्या आदेशानुसार जात वैधता प्रमाणपत्र सादर करणे आवश्यक होते. ते सादर न केल्याने त्यांना उपअभियंता पदावर पदावनत करण्याचा आदेश आयुक्तांनी दिला आहे.
--