देहूत अवैध गुटखा, तंबाखू जप्त

देहू, ता. १६ ः विक्रीस बंदी असलेल्या गुटख्याची विक्री करणाऱ्या टपरी चालकास देहूरोड पोलिसांनी अटक केली. त्याच्याकडून गुटखा, सुगंधित तंबाखू व पानमसाला असा एकूण तेवीस हजार रुपयांचा माल जप्त करण्यात आला. रविवारी (ता. १४) रोजी दुपारी दोनच्या सुमारास देहूतील वैकुंठस्थान जवळील पान टपरी येथे पोलिसांनी कारवाई केली. पोलिस कर्मचारी विजय दौंडकर यांनी याप्रकरणी फिर्याद दिली आहे. संतोष खरात (वय ४३, रा. देहू) असे आरोपीचे नाव आहे. पोलिसांनी दिलेल्या माहितीनुसार, सदर आरोपी हा आपल्या पानटपरीमध्ये शासन बंदी असलेला गुटखा अवैध रित्या विकत असल्याचे आढळून आले. त्यानुसार त्याच्यावर कारवाई करण्यात आली.