पटेल, गांधी यांना अभिवादन; अन् मतदानासह एकतेची शपथ

पिंपरी, ता. ३१ ः विधानसभा निवडणुकीसाठी २० नोव्हेंबर रोजी मतदान होणार आहे. त्यात महापालिकेतील सर्व अधिकारी आणि कर्मचाऱ्यांनी मतदानाचा हक्क बजावून लोकशाही उत्सवात सहभागी व्हावे, असे आवाहन अतिरिक्त आयुक्त चंद्रकांत इंदलकर यांनी केले.
माजी उपपंतप्रधान सरदार वल्लभभाई पटेल यांची जयंती आणि दिवंगत पंतप्रधान इंदिरा गांधी यांच्या पुण्यतिथीनिमित्त त्यांच्या प्रतिमेस महापालिकेतर्फे अतिरिक्त आयुक्त चंद्रकांत इंदलकर यांनी पुष्पहार अर्पण करून अभिवादन केले. त्यावेळी अतिरिक्त आयुक्त इंदलकर बोलत होते. उपस्थित कर्मचाऱ्यांनी ‘आम्ही, भारताचे नागरिक, लोकशाहीवर निष्ठा ठेवून, या‌द्वारे प्रतिज्ञा करतो की, आपल्या देशाच्या लोकशाही परंपरांचे जतन करू. मुक्त निःपक्षपाती व शांततापूर्ण वातावरणातील निवडणुकांचे पावित्र्य राखू. प्रत्येक निवडणुकीत निर्भयपणे, तसेच धर्म, वंश, जात, समाज, भाषा यांच्या विचारांच्या प्रभावाखाली न येता किंवा कोणत्याही प्रलोभनास बळी न पडता मतदान करू,’ अशी शपथ घेऊन शंभर टक्के मतदान करण्याचा निर्धार केला. उपआयुक्त अण्णा बोदडे, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक, कर्मचारी महासंघाचे बालाजी अय्यंगार आदी उपस्थित होते.

राष्ट्रीय एकतेची शपथ
सरदार पटेल यांची जयंती राष्ट्रीय एकता दिवस म्हणून साजरी केली जाते. त्यानिमित्त राष्ट्रीय एकतेची, ‘आम्ही राष्ट्राची एकता, अखंडता व सुरक्षा अबाधित राखण्यासाठी स्वतःला समर्पित करू. तसेच आम्ही देशवासियांमध्ये हा संदेश पोचविण्यासाठी देखील भरीव प्रयत्न करू. आम्ही ही शपथ आपल्या देशाची एकता टिकवून ठेवण्याच्या भावनेने घेत आहोत, जी सरदार वल्लभभाई पटेल यांच्या दूरदृष्टी व कार्यामुळे राखणे शक्य झाले आहे. तसेच देशाची अंतर्गत सुरक्षा सुनिश्चित करण्याकरिता आम्ही स्वतःचे योगदान देण्याचा सुद्धा सत्यनिष्ठापूर्वक संकल्प करीत आहोत,’ अशी सामूहिक शपथ अधिकारी, कर्मचाऱ्यांनी घेतली.
---