बेशिस्त वाहन चालकांमुळे वाहतूककोंडीत भर

पिंपरी, ता. ३१ : जुन्या मुंबई-पुणे महामार्गावरील निगडी ते चिंचवड मेट्रोचे काम सुरू असून, यासाठी ठिकठिकाणी बॅरीकेड्स उभारले आहेत. यामुळे हा रस्ता अरुंद झाला आहे. यातून मार्ग काढताना वाहन चालकांना कसरत करावी लागते. अशातच खासगी ट्रॅव्हल्ससह इतरही काही बेशिस्त वाहनचालक या रस्त्यावरच वाहने उभी करीत असल्याने वाहतूक कोंडीत भर पडत आहे.

निगडी ते चिंचवड हा अत्यंत वर्दळीचा मार्ग असून या मार्गावर वाहनांची संख्याही अधिक असते. दरम्यान, सध्या याच मार्गावर मेट्रोचे काम सुरू असल्याने लोकमान्य टिळक चौक, बजाज कंपनी प्रवेशद्वार, काळभोरनगर येथील बीआरटी मार्गिका बंद केली आहे. तसेच सेवा रस्त्यावरील बीआरटी मार्गिकेलगतच्या रस्त्यावर बॅरिकेड्स उभारले आहेत. त्यामुळे हा मार्ग अत्यंत अरुंद झाला आहे. यामुळे या परिसरात वाहतूक कोंडी होत असते. ती सुरळीत करताना प्रशासनाचे नाकीनऊ येते. अशातच हा रस्ता अरुंद असतानाही याच मार्गावर काही वाहनचालक त्यांचे वाहन उभे करून निघून जातात. त्यामुळे वाहतुकीस अडथळा निर्माण होऊन दूरपर्यंत वाहनांच्या रांगा लागतात. यामध्ये अनेक वाहने अडकून पडतात. रस्त्यावर कुठेही उभ्या राहणाऱ्या वाहनांमध्ये खासगी बसचा अधिक प्रमाणात समावेश असतो.

खासगी बस चालकांना लागेना शिस्त
खासगी बस मूळ ठिकाणाहून निघाल्यानंतर प्रवासी घेण्यासाठी कुठेही थांबत असल्याने वाहतूक कोंडी होते. ही कोंडी टाळण्यासाठी खासगी बसला प्रवासी घेण्यासाठी व सोडण्यासाठी वाहतूक शाखेकडून पीक व ड्रॉप पॉइंट निश्चित करून देण्यात आले आहेत. तरीही काही खासगी बसचालक बेशिस्तरित्या कुठेही बस उभ्या करतात. निगडी ते आकुर्डी रस्त्यावरही मोठ्या प्रमाणात अशा बस उभ्या असतात.

‘‘महाविद्यालयात जाण्यासाठी याच मार्गाने जावे लागते. या मार्गावर मेट्रोचे काम सुरू असल्याने रस्ता अरुंद झाला आहे. यामध्ये वाहन अडकल्यास पुढे जाण्यास उशीर होतो. बेशिस्त वाहन चालकांवर कारवाई करणे आवश्यक आहे.
- प्रतीक कदम, विद्यार्थी
---
‘‘वाहतूक कशी सुरळीत राहील यासाठी प्रयत्न असतो. रस्त्यावर कुठेही बेशिस्तरित्या उभ्या असणाऱ्या वाहनांवर सतत कारवाई केली जात असते. वाहनचालकांनी नियमांचे पालन करणे आवश्यक आहे.
- रूपाली बोबडे, पोलिस निरीक्षक, निगडी, वाहतूक विभाग
------------------------